ភ្នំពេញ — ក្រសួងសុខាភិបាលកម្ពុជាបានប្រកាសនៅព្រឹកថ្ងៃទី២៧ កក្កដា នេះថា ក្រោយធ្វើការវិភាគដោយវិទ្យាស្ថានប៉ាស្ទ័រ គេបានរកឃើញករណីឆ្លងវីរុសកូវីដ១៩ ដែលបំប្លែងថ្មីប្រភេទ Delta ចំនួន ៣៩នាក់ ក្នុងនោះអ្នកដំណើរវិលត្រឡប់មកពីប្រទេសថៃតាមច្រកព្រំដែនកម្ពុជា-ថៃ ចំនួន ២១នាក់, បុគ្គលិកសុខាភិបាលចំនួន ៤នាក់ និងប្រជាពលរដ្ឋក្នុងសហគមន៍ដែលប៉ះពាល់ផ្ទាល់ចំនួន ៦នាក់ ព្រមទាំងប្រជាពលរដ្ឋក្នុងសហគមន៍ដែលមិនប៉ះពាល់ផ្ទាល់ចំនួន ៨នាក់។
សម្រាប់បុគ្គលិកសុខាភិបាលដែលត្រូវរកឃើញវិជ្ជមានកូវីដ១៩បម្លែងថ្មី Delta ត្រូវបានបញ្ជាក់ថា គឺជាបុគ្គលិកសុខាភិបាលខេត្តឧត្តរមានជ័យ។
គួរកត់សម្គាល់ថា គិតចាប់ពីថ្ងៃទី៣១ ខែមីនា ដល់ថ្ងៃទី២៥ ខែកក្កដា ឆ្នាំ២០២១ កម្ពុជាបានរកឃើញអ្នកមានវិជ្ជមានវីរុសកូវីដ១៩ប្រភេទ ដែលតា សរុបចំនួន ១១៤នាក់ហើយ។
ពាក់ព័ន្ធនឹងការចម្លងមេរោគបម្លែងថ្មីនេះ លោក ម៉ម ប៊ុនហេង រដ្ឋមន្រ្តីក្រសួងសុខាភិបាល បានធ្វើការអំពាវនាវដល់បងប្អូនប្រជាពលរដ្ឋទាំងអស់ សូមបន្តប្រុងប្រយ័ត្នខ្ពស់ ការពារខ្លួន កុំភ្លេចខ្លួនឲ្យសោះ ដោយត្រូវចេះផ្លាស់ប្តូរទម្លាប់រស់នៅរបស់ខ្លួនស្របតាមពាក្យស្លោក «រៀនរស់នៅធម្មតាជាមួយវីរុសកូវីដ១៩ តាមបែបគន្លងថ្មី ក្នុងបរិបទប្រយុទ្ធនឹងជំងឺកូវីដ១៩» សំដៅបង្ការ គ្រប់គ្រង និងកាត់ផ្តាច់ខ្សែចម្លង នៃវីរុសកូវីដ១៩ ជាពិេសេសពួកប្រភេទបំប្លែងថ្មីនេះ ឬក៏ប្រភេទថ្មីផ្សេងទៀត ដែលអាចកើតមានក្នុងព្រះរាជាណាចក្រកម្ពុជាយើងជាយថាហេតុ៕
