ព្រះសីហនុ — អគារសម្រាប់ព្យាបាលអ្នកជំងឺកូវីដ១៩ដែលជាពិរុទ្ធជន ឬជនត្រូវចោទ ត្រូវបានរដ្ឋបាលខេត្តព្រះសីហនុរៀបចំសាងសង់នៅខាងក្រោមអគារជំងឺសួត ក្នុងបរិវេណមន្ទីរពេទ្យបង្អែកខេត្តព្រះសីហនុ ដោយមាន ៤បន្ទប់ និងអាចដាក់អ្នកជំងឺកូវីដ១៩ រហូតដល់ទៅ៤០នាក់។
ក្នុងឱកាសចុះពិនិត្យអគារសម្រាប់ព្យាបាលអ្នកជំងឺកូវីដ-១៩ ដែលជាពិរុទ្ធជន ឬជនដែលត្រូវចោទ កាលពីរសៀលថ្ងៃទី២៧ កក្កដា លោក គួច ចំរើន អភិបាលខេត្តព្រះសីហនុ បានធ្វើការណែនាំឱ្យប្រធានពន្ធនាគារខេត្ត នៅពេលដែលមានពិរុទ្ធជន ឬជនជាប់ចោទ ធ្វើតេស្តរកឃើញមានវិជ្ជមានកូវីដ-១៩ គឺត្រូវយកមកព្យាបាលនៅមន្ទីរពេទ្យបង្អែកខេត្ត ដោយទី១. គឺអាចគ្រប់គ្រងសន្តិសុខបានល្អក្នុងការព្យាបាល និងទី២. កាត់ផ្តាច់ការចម្លងទៅអ្នកទោសដ៏ទៃទៀតនៅក្នុងពន្ធនាគារ។
ម្យ៉ាងទៀតសកម្មភាពបង្ការទុកមុននេះ គឺជាវិធានការដ៏ល្អមួយ សម្រាប់ការគ្រប់គ្រងតាមដានអ្នកជំងឺកូវីដ មិនបង្កឱ្យឆ្លងទៅអ្នកដទៃ៕