ត្បូងឃ្មុំ — បើទោះបីជាប្រជាជនកម្ពុជា និងវៀតណាម ត្រូវបានហាមឃាត់មិនឲ្យឆ្លងកាត់ព្រំដែន ដើម្បីការពារការរាតត្បាត នៃជំងឺកូវីដ១៩ក្តី ប៉ុន្តែសកម្មភាពពាណិជ្ជកម្ម នៃប្រទេសទាំងពីរនៅតែដំណើរជាធម្មតា ដោយរថយន្តដឹកទំនិញទាំងអស់អាចឆ្លងកាត់ព្រំដែន ដោយគ្រាន់តែធ្វើការផ្លាស់ប្តូរអ្នកបើកបរប៉ុណ្ណោះ។
មន្រ្តីប្រចាំច្រកទ្វារអន្តរជាតិត្រពាំងថ្លុង ស្ថិតក្នុងស្រុកពញាក្រែក ខេត្តត្បូងឃ្មុំ បានថ្លែងឲ្យដឹងថា ដំណើរការចរាចរណ៍ទំនិញទៅមកតាមព្រំដែន នៅតែប្រព្រឹត្តទៅជាប្រក្រតី គឺចាប់ពីម៉ោង៧ព្រឹក រហូតដល់ម៉ោង៥ល្ងាច ក្នុងនោះ ចំពោះសកម្មភាពដឹកចេញទៅវៀតណាម គឺរថយន្តអនុញ្ញាតឲ្យចូលដោយដោះដូរអ្នកបើកបរនៅតំបន់ ស ដោយមានការបាញ់អាកុលទៅលើឡាន សម្លាប់មេរោគ ពីមន្ត្រីចតាលីស័ក។
ចំពោះសកម្មភាពដឹកចូលក្នុងកម្ពុជា គឺរថយន្តដឹករបស់វៀតណាម ត្រូវសាងទំនិញនៅតំបន់ ស ដូចគ្នា ក្នុងនោះមាន២វិធី ដោយរថយន្តសណ្តោងរ៉ឺម៉កដឹកទំនិញវៀតណាម ត្រូវមកដោះដូរក្បាលរថយន្តសណ្តោង រីឯរថយន្តដែលមិនមានសណ្តោងរ៉ឺម៉ក ត្រូវប្តូរតៃកុងរថយន្ត។
បើតាមការបញ្ជាក់របស់មន្រ្តីថា កសិផលកម្ពុជាដែលដឹកទៅវៀតណាម តាមច្រកទ្វារព្រំដែនអន្តរជាតិត្រពាំងផ្លុង និងច្រកទ្វារទ្វេភាគីដារភាគច្រើនគឺជាដំឡូងមី ក៍ដូចជាបន្លែ និងផ្លែឈើមានស្វាយចន្ទី ស្វាយកែវរមៀតជាដើម។
ដោយឡែកខាងវៀតណាមវិញទំនិញដែលដឹកចូលមកកម្ពុជាភាគច្រើនគឺចំណីសត្វ ថ្នាំសម្លាប់សត្វល្អិត ជីគីមី ព្រមទាំងឥវ៉ាន់ចាប់ហ៊ួយមួយចំនួន ជាដើម៕
