ភ្នំពេញ — អនុគណៈកម្មការស្រាវជ្រាវជំងឺកូវីដ១៩ បានប្រកាសនៅព្រឹកព្រលឹមថ្ងៃនេះថា គេបានរកឃើញអ្នកឆ្លង វីរុសកូវីដ-១៩ ចំនួន ៨ នាក់ ស្នៅក្នុងប្រតិបត្តិការស្វែងរក អ្នកសង្ស័យដែលជាប់ពាក់ព័ន្ធជាមួយអ្នកដែលបានឆ្លង វីរុសកូវីដ-១៩ បំប្លែងថ្មី Delta កាលពីយប់ថ្ងៃទី ២ សីហា នៅ ភូមិតាងួន សង្កាត់កាកាប១ ខណ្ឌពោធិ៍សែនជ័យ។
យ៉ាងណាមិញ ករណីរកឃើញថ្មីនេះ មិនទាន់ត្រូវបានបញ្ជាក់ច្បាស់ថា ជាករណីឆ្លងវីរុសបំប្លែងថ្មី Delta នោះទេ ដោយក្រុមការងារពាក់ព័ន្ធកំពុងវិភាគសំណាក លម្អិត នៅមន្ទីរពិសោធន៍។
ជាមួយគ្នានេះដែរ នៅល្ងាចថ្ងៃទី២ សីហា នោះដែរ រដ្ឋបាលរាជធានីភ្នំពេញ បានចេញសេចក្តីសម្រេចចំនួន២ ដោយធ្វើការបិទខ្ទប់ច្រកផ្លូវលេខ ៣៧២, ៣៧២Z ផ្លូវលេខ ៣៦២ ស្ថិតក្នុងភូមិ៥ សង្កាត់បឹងសាឡាង ខណ្ឌទួលគោក និងបិទខ្ទប់កំណាត់ផ្លូវលេខ ៩៣ ស្ថិតក្នុងភូមិផ្សារតូច សង្កាត់ទួលសង្កែទី១ ខណ្ឌឬស្សីកែវ ដោយទីតាំងនោះមានការសង្ស័យជាប់ពាក់ព័ន្ធមេរោគបំប្លែងខ្លួនថ្មី ប្រភេទដែលតា។
ទីតាំងដែលត្រូវបិទខ្ទប់ទាំងនេះ នឹងត្រូវហាមឃាត់មិនឲ្យមានការចេញចូល និងការជួបជុំមនុស្ស រយៈពេល១៤ថ្ងៃ ដោយគិតចាប់ពីម៉ោងសូន្យ ថ្ងៃទី៣ សីហា រហូតដល់ថ្ងៃទី១៦ ខែសីហា ឆ្នាំ២០២១។
សូមបញ្ជាក់ថា កាលពីសប្តាហ៍កន្លងទៅនេះ រាជរដ្ឋាភិបាលកម្ពុជាបានធ្វើការសម្រេចបិទខ្ទប់ខេត្តចំនួន៨ជាប់ព្រំដែនកម្ពុជា-ថៃ រយៈពេល១៤ថ្ងៃ ដើម្បីទប់ស្កាត់ការឆ្លងរាលដាល នៃជំងឺកូវីដ១៩ ប្រភេទដែលតា ពីពលករខ្មែរត្រឡប់មកពីប្រទេសថៃ។ បើទោះជាមានការបិទខ្ទប់ខេត្តជាប់ព្រំដែនកម្ពុជា-ថៃ ក៏ដោយ កាលពីពាក់កណ្តាលយប់ថ្ងៃម្សិលមិញ ក្រសួងសុខាភិបាលកម្ពុជា បានប្រកាសពីការរកឃើញករណីជំងឺកូវីដ១៩ ប្រភេទបំប្លែងថ្មី ដែលតា ចំនួន ៥ករណីនៅរាជធានីភ្នំពេញ ខណៈដែលខេត្តកំពង់ចាម ព្រៃវែង និងត្បូងឃ្មុំ ក៏ត្រូវរកឃើញផងដែរ៕