សៀមរាប — អាជ្ញាធរជាតិអប្សរា កាលពីថ្ងៃទី១៧ សីហា ម្សិលមិញ បានចុះទប់ស្កាត់ការទន្ទ្រានព្រៃដើម្បីយកដីធ្វើជាកម្មសិទ្ធិ ពីសំណាក់ពលរដ្ឋប្រមាណជាង១០នាក់ នៅចំណុចភូមិចំនួនពីរ គឺភូមិគីរីមីនន្ទ និងភូមិតាប៉ាង ក្នុងឃុំអំពិល ស្រុកប្រាសាទបាគង នៃខេត្ត សៀមរាប។
ការចុះទប់ស្កាត់នេះ គឺក្រោយពីពលរដ្ឋទាំងនោះបានយកកូនស្វាយចន្ទីទៅដាំលើដីព្រៃ និងដីស្រែ ដែលជាដីសាធារណ:របស់រដ្ឋ ស្ថិតក្នុងតំបន់ការពារដោយអាជ្ញាធរអប្សរា ខណៈក្រុមពលរដ្ឋបានអះអាងថា ដីខាងលើដែលមានទំហ៊ំជាង១០០ហិកតាជារបស់ពួកគាត់។
ជាមួយនឹងការអះអាងបែបនេះ មន្ត្រីអាជ្ញាធរអប្សរាបានលើកឡើងថា ដីខាងលើនេះជាកម្មសិទ្ធិរបស់រដ្ឋ ដែលត្រូវបានការពារដោយអាជ្ញាធរជាតិអប្សរា ហើយតាមការស្រាវជ្រាវក្រុមពលរដ្ឋខាងលើ មិនមានដីនៅទីតាំងកើតហេតុនោះទេ ហើយតាមពិតទៅពួកគាត់(ពលរដ្ឋ)មួយចំនួនជាកម្មកររបស់បុគ្គលជាមេឈ្មួញដីដ៏ល្បីឈ្មោះម្នាក់ ឯមួយចំនួនទៀតគឺបុគ្គលមេឈ្មួញដីជួលឲ្យមកដាំកូនស្វាយចន្ទី ក្រោមលេសពលរដ្ឋអាស្រ័យផលតែប៉ុណ្ណោះ។
ជាមួយនឹងការបញ្ជាក់បែបនេះ អាជ្ញាធរជាតិអប្សរា ក៍បានអំពាវនាវដល់ក្រុមពលរដ្ឋខាងលើ បញ្ឍប់ការទន្រ្ទានព្រៃ និងដកខ្លួនចេញពីការរំលោភបំពានដីរបស់រដ្ឋ ក្រោមការញុះញង់របស់បុគ្គលមេឈ្មួញដី ត្បិតអាជ្ញាធរអប្សរា និងអនុវត្តតាមផ្លូវតុលាការ ប្រសិន បើនៅតែបំពានលើសម្បត្តិរដ្ឋ៕
ដោយ៖ តាំង ហូ