កាលពីវេលាម៉ោងប្រមាណ១១ និង៣០នាតី ថ្ងៃទី២៣ ខែសីហា ឆ្នាំ២០២១ម្សិលមិញ កម្លាំងអធិការនគរបាលស្រុកសំពៅលូន សហការជាមួយកម្លាំងប៉ុស្តិ៍ការពារព្រំដែនគីឡូ១៣ នៃវរសេនាតូចនគរបាលការពារព្រំដែនគោកលេខ ៨១៧ ប្រចាំការតាមមាត់អូរព្រំដែន បានធ្វើការបង្ក្រាបករណីនាំមនុស្សឆ្លងដែន នៅចំណុចដីថៃជាប់មាត់អូរព្រំដែនកម្ពុជា-ថៃ ជាប់ភូមិសាស្ត្រភូមិពោធិ៍ជ្រៃ ឃុំសិរីមានជ័យ ស្រុកសំពៅលូន ខេត្តបាត់ដំបង។
យោងតាមរបាយការណ៍របស់សមត្ថកិច្ចថា ក្នុងការបង្រ្កាបនោះ សមត្ថកិច្ចបានឃាត់ខ្លួនជនសង្ស័យជាមេខ្យល់ចំនួន០២នាក់ និងប្រជាពលរដ្ឋ ដែលសន្និដ្ឋានថាជាពលករក្នុងអំពើនាំចេញនេះចំនួន ០៦នាក់ ក្នុងនោះស្រីចំនួន ០៤នាក់។
មេខ្យល់ទាំង២នាក់ខាងលើ ១.ឈ្មោះ យឹម ជឿន ភេទប្រុស អាយុ ៣០ឆ្នាំ មានទីលំនៅភូមិពោធិ៍ជ្រៃ ឃុំសិរីមានជ័យ ស្រុកសំពៅលូន ខេត្តបាត់ដំបង និង២.ឈ្មោះ មិត្ត ពេជ្រ ភេទប្រុស អាយុ ១៨ឆ្នាំ មានទីលំនៅភូមិពោធិ៍ជ្រៃ ឃុំសិរីមានជ័យ ស្រុកសំពៅលូន ខេត្តបាត់ដំបង។
បច្ចុប្បន្នជនសង្ស័យជាមេខ្យល់ចំនួន ០២នាក់ខាងលើ ត្រូវបានកសាងសំណុំរឿងបញ្ជូនមកការិយាល័យជំនាញដើម្បីអនុវត្តបន្តតាមផ្លូវច្បាប់ រីឯប្រជាពលរដ្ឋរងគ្រោះទាំង០៦នាក់ សមត្ថកិច្ចបានធ្វើការអប់រំណែនាំ និងចុះកិច្ចសន្យារួចឱ្យវិលត្រឡប់ទៅមូលដ្ឋានវិញ៕