ករណីបឹងតាកែវ ដែលត្រូវអង្គភាពប្រឆាំងអំពើពុករលួយ ប្រាប់ឲ្យអាជ្ញាធរខេត្តតាកែវ មានវិធានការទប់ស្កាត់ ចំពោះករណីជីកយកអាចម៌ដី ការចាក់ដីលុបអាង និងការសង់សំណង់ផ្សេងៗនោះ សម្រាប់លោក ផេង វុធ ប្រធានមន្ទីរ រ៉ែ និងថាមពល ខេត្តតាកែវ បានថ្លែងថា សម្រាប់ករណីរណ្តៅដីនៅក្នុងបឹងតាកែវ គឺមានច្បាប់ទាំងអស់។
លោកថា ក្នុងលិខិតរបស់អង្គភាពប្រឆាំងអំពើពុករលួយបានបញ្ជាក់យ៉ាងច្បាស់ហើយថា បាតុភាពដែលកើតមានចំពោះបឹងតាកែវនោះ គឺជាទំនាស់បុគ្គលប៉ុណ្ណោះ ហើយចំពោះករណីរណ្តៅដីនៅក្នុងបឹងតាកែវនោះ គឺសុទ្ធតែមានច្បាប់ចេញពីមន្ទីររ៉ែទាំងអស់ ហើយប្រសិនបើគ្មានច្បាប់ទេ គឺច្បាស់ជាជាប់គុកហើយ។
សូមបញ្ជាក់ដែរថា កាលពីថ្ងៃទី៣១ ខែសីហា ឆ្នាំ២០២១ អ្នកនាំពាក្យអង្គភាពប្រឆាំងអំពើពុករលួយ បានចេញសេចក្តីប្រកាសព័ត៌មានមួយ ដោយស្នើសុំឱ្យដល់អាជ្ញាធរខេត្តតាកែវត្រូវមានវិធានការទប់ស្កាត់ជាបន្ទាន់ ចំពោះ បុគ្គលដែលពាក់ពន្ធ័នឹងករណីមិនប្រក្រតីដែលកើតមានក្នុងបរិវេណអាងទឹកតាកែវ ក្នុងក្រុងដូនកែវ ខេត្តតាកែវ។
ក្នុងនោះមានដូចជា ការជីកយកអាចម៍ដីពីផ្ទៃបាតបឹង, ការចាក់ដីលុបផ្ទៃអាងទឹក, ការសាងសង់សំណង់ក្នុងបរិវេណអាងទឹក, ព្រមទាំងមានការទិញលក់ដីធ្លីក្នុងបរិវេណអាងទឹកដោយមានការបញ្ជាក់ទទួលស្គាល់ពីអាជ្ញាធរមូលដ្ឋានទៀតផង។
ជាមួយគ្នានេះ បើតាមអ្នកនាំពាក្យអង្គភាពប្រឆាំងអំពើពុករលួយថា ខ្លួននឹងបន្តតាមដានករណីនេះ និងមានវិធានការតាមផ្លូវច្បាប់បន្តបន្ទាប់ទៀត តាមសភាពការវិវដ្តជាក់ស្តែង៕