ប្រជាពលរដ្ឋជិត៥រយគ្រួសារ រស់នៅក្នុងភូមិត្បែងទទឹង និងភូមិខ្លាក្រហឹម នៃឃុំតាភេម ស្រុកត្រាំកក់ កាលពីពេលថ្មីៗនេះ បាននាំគ្នាផ្តិតមេដៃ ស្នើដល់អភិបាលស្រុក ឲ្យជួយអន្តរាគមន៍ ក្រោយគម្រោងស្ថាបនាផ្លូវលំសម្រាប់ពួកគាត់ធ្វើដំណើរដឹកជញ្ជូនកសិផលត្រូវបានរាំងស្ទះដោយសាររបងថ្ម របស់ផ្ទះអ្នកមានអំណាចម្នាក់។
_
បើតាមការលើកឡើងរបស់ប្រជាពលរដ្ឋថា ផ្លូវនេះត្រូវបានឃុំរៀបចំធ្វើការសាងសង់ដោយប្រើប្រាស់នូវថវិកាមូលនិធិឃុំ មានប្រវែងប្រមាណ ១៨០០ម៉ែត្រ ប៉ុន្តែផ្លូវនេះមិនអាចស្ថាបនាទៅមុខបានទេ ដោយសារបងថ្មរបស់អ្នកមានអំណាចម្នាក់មានប្រវែងដល់ទៅជាង១០០ម៉ែត្រ មិនព្រមរុះរើចេញសោះ ដែលធ្វើឲ្យគម្រោងត្រូវរាំងស្ទះរហូតដល់បច្ចុប្បន្ន។
ពលរដ្ឋថា ក្រោយឃើញកាស្ថាបនាមិនទៅមុខ ធ្វើឲ្យមានការលំបាកដល់ប្រជាពលរដ្ឋក្នុងការធ្វើដំណើរនោះហើយ ទើបពួកគាត់នាំគ្នាផ្តិតមេដៃ សុំឲ្យលោកចៅហ្វាយស្រុកជួយអន្តរាគមន៍តែម្ដងទៅ។
លោក សុំ ផាសឺត មេឃុំតាភេម បានឲ្យដឹងថា គម្រោងផ្លូវដែលធ្វើឡើងដោយមូលនិធិឃុំសង្កាត់នោះ គឺចំណាយលុយ២៣១លានរៀល ដេញថ្លៃបានដោយក្រុមហ៊ុនគឹម សម្បតិ្ត ដើម្បីស្ថាបនាផ្លូវលំក្រាលគ្រួសសរ មានប្រវែង១៨០០មែត្រ តែរហូតមកទល់ពេលនេះស្ថាបនាមិនទៅមុខទេដោយស្ទះរបងថ្មរបស់លោក លឹម សាម៉ន ហៅចាប ជាមន្ត្រីយោធានៅភ្នំពេញ ដោយគាត់មិនព្រមរុះរើ។
យ៉ាងណាក៏ដោយ លោកមេឃុំថា សំណើរបស់ពលរដ្ឋទាំងអស់ លោកនឹងជំរាបទៅលោកអភិបាលស្រុកត្រាំកក់ តើលោកនឹងមានចំណាត់ការយ៉ាងណាទៀត?
នៅថ្ងៃនេះ យើងមិនអាចស្វែងរកការបំភ្លឺពីលោក កៅ វគ្គសែល អភិបាលស្រុកត្រាំកក់ បានទេ ចំពោះចំណាត់ការរបស់អាជ្ញាធរស្រុក ករណីរបងរបស់អ្នកមានអំណាចមួយនេះ តែគេរំពឹងថា អាជ្ញាធរស្រុកនឹងមិនឲ្យអ្នកមានអំណាចធ្វើឲ្យរាំងស្ទះដល់ការអភិវឌ្ឍន៍របស់មូលដ្ឋាននេះទេ៕
