នៅព្រឹកថ្ងៃទី២០ ខែកញ្ញា ឆ្នាំ២០២១ ក្រុមការងាររបស់ក្រុមហ៊ុនសាប៊ូលីប៉ាយ បាននាំយកសាប៊ូ ក៏ដូចជាសម្ភារៈទប់ស្កាត់ជំងឺកូវីដ១៩មួយចំនួន ប្រគល់ជូនដល់គណៈគ្រប់គ្រងវិទ្យាល័យជាស៊ីមសន្ធម៉ុក សម្រាប់ប្រើប្រាស់ ខណៈវិទ្យាល័យមួយនេះ កំពុងបើកដំណើរការឡើងវិញ ដោយអនុវត្តនូវវិធានការ SOP ដែលបានដាក់ចេញដោយក្រសួងអប់រំ យុវជន និងកីឡា។
ក្រុមការងារសាប៊ូលីប៉ាយ ផ្តល់សាប៊ូដល់អភិបាលខណ្ឌទួលគោក
ក្នុងឱកាសនោះ លោក ជា ពិសី អភិបាលខណ្ឌទួលគោក បានមានប្រសាសន៍ថា អំណោយរបស់ក្រុមហ៊ុនសាប៊ូលីប៉ាយ នៅពេលនេះ គឺជាអំណោយដ៏មានសារៈសំខាន់ ចំពេលអាជ្ញាធរបានអនុញ្ញាតឲ្យសាលារៀនបើកឡើងវិញ ដែលចាំបាច់ត្រូវការសម្ភារៈទាំងនេះដើម្បីប្រើប្រាស់។ ជាមួយគ្នានេះ លោក ជា ពិសី ក៏បានជូនពរឲ្យក្រុមហ៊ុនរកស៊ីទទួលទានមានបាន ជៀសផុតនូវជំងឺកូវីដ១៩ ហើយរំពឹងថា នឹងមានឱកាសក្នុងការសហការគ្នានៅពេលក្រោយទៀត។
លោក ជា ពិសី អភិបាលខណ្ឌទួលគោក
លោក ឡៅ ប៉ូលីណា នាយកវិទ្យាល័យជាស៊ីមសន្ធរម៉ុក ក៏បានថ្លែងនូវសេចក្តីសោមនស្សរីករាយក្រៃលែង ដែលទទួលបាននូវសម្ភារៈដ៏មានតម្លៃ ក្នុងបរិបទកូវីដ១៩នេះ ហើយថា លោកនឹងយកទៅប្រើប្រាស់សម្រាប់លោកគ្រូអ្នកគ្រូ ក៏ដូចជាសិស្សានុសិស្សលាងសម្អាតដៃ ក៏ដូចជាលាងសម្អាតទីតាំងនានាក្នុងសាលា។
លោក ឡៅ ប៉ូលីណា នាយកវិទ្យាល័យជាស៊ីមសន្ធរម៉ុក
លោក ម៉ាន់ ពន្លឺពេជ្រ តំណាងក្រុមហ៊ុនសាប៊ូលីប៉ាយ បានមានប្រសាសន៍ថា គិតមកទល់ពេលនេះ សាលារៀនក្នុងខណ្ឌចំនួន២ហើយ គឺខណ្ឌច្បារអំពៅ និងខណ្ឌទួលគោក ដែលក្រុមហ៊ុនបានផ្តល់សាប៊ូជូន សម្រាប់រួមគ្នាបង្ការ និងទប់ស្កាត់ការរីករាលដាល នៃជំងឺកូវីដ១៩ ហើយក្រុមហ៊ុននឹងបន្តយុទ្ធនាការចែកជូនសាប៊ូដល់គ្រឹះស្ថានសិក្សាជាបន្តបន្ទាប់ទៀត។
លោក ម៉ាន់ ពន្លឺពេជ្រ នាយកផ្នែកលក់ និងទីផ្សារ ក្រុមហ៊ុនសាប៊ូលីប៉ាយ
តាមលោក ពន្លឺពេជ្រ គោលនយោបាយរបស់ក្រុមហ៊ុនសាប៊ូលីប៉ាយ គឺចែកជូនសាប៊ូទៅដល់គ្រប់គ្រឹះស្ថានសិក្សាទាំងអស់ដែលត្រូវការ ដោយគ្រឹះស្ថានសិក្សាទាំងនោះ គ្រាន់តែធ្វើការទំនាក់ទំនងកាន់ទំព័រហ្វេសប៊ុកផ្លូវការរបស់ក្រុមហ៊ុនសាប៊ូលីប៉ាយ ឬតាមដេប៉ូសាខារបស់ក្រុមហ៊ុនតែប៉ុណ្ណោះ។
សូមបញ្ជាក់ថា ក្រោមពាក្យស្លោក លីប៉ាយ គិតគូពីសុខភាពប្រជាជនជាធំ កាលពីពេលថ្មីៗនេះ ក្រុមហ៊ុនបានធ្វើការប្រកាសផ្តល់ជូនគ្រឹះស្ថានសិក្សាសាធារណៈទាំងអស់ នូវសាប៊ូលីប៉ាយ សម្រាប់ជូនលោកគ្រូអ្នកគ្រូ សិក្សានុសិស្សប្រើប្រាស់ ក្នុងការចូលរួមបង្ការ និងទប់ស្កាត់ការរីករាលដាល នៃជំងឺកូវីដ១៩ ក្នុងឱកាសដែលក្រសួងអប់រំបានអនុញ្ញាតឲ្យបើកដំណើរសាលារៀនឡើងវិញ៕
