ភ្នំពេញ — បើតាមអ្នកនាំពាក្យរដ្ឋលេខាធិការដ្ឋានអាកាសចរស៊ីវិលបានឲ្យដឹងថា អាកាសយានដ្ឋានអន្តរជាតិតារាសាគរតម្លៃជាង២០០លានដុល្លារ នៅក្នុងខេត្តកោះកុង នឹងសាងសង់រួចរាល់នៅក្នុងខែតុលា ហើយនឹងដាក់ឲ្យដំណើរការសាកល្បង នៅថ្ងៃទី៣០ ធ្នូ ចុងឆ្នាំ២០២១នេះ។
អាកាសយានដ្ឋានអន្តរជាតិតារាសាគរ ត្រូវបានអភិវឌ្ឍដោយក្រុមហ៊ុនចិនមួយ ឈ្មោះ Chinese Firm Tianjin Union Development Group (UDG) ដែលទទួលបានដីសម្បទានសេដ្ឋកិច្ចពីរដ្ឋាភិបាលកម្ពុជា។ ក្រុមហ៊ុននេះ បានសាងសង់អាកាសដ្ឋានអន្តរជាតិតារាសាគរ នៅលើផ្ទៃដីប្រមាណ២១៨ហិកតា ក្នុងទំហំទឹកប្រាក់ជាង២០០ដុល្លារ នៅក្នុងស្រុកបូទុមសាគរ ខេត្តកោះកុង ក្បែរនឹងឈូងសមុទ្រប្រទេសថៃ។
បើតាមលោក ស៊ីន ចាន់សិរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរស៊ីវិលថា អាកាសយានដ្ឋានអន្តរជាតិតារាសាគរនេះ មានសមត្ថភាពទទួលចុះចតយន្តហោះកម្រិត 4E ដែលជាកម្រិតប្រភេទយន្តហោះជិតដល់ខ្នាតធំបង្អស់ ក្នុងនោះយន្តហោះប្រភេទ Boeing747 ក៏អាកាសយានដ្ឋានអាចទទួលចុះចតបាន, យន្តហោះAirbus340 និង350 ក៏ទទួលយកបានដែរ៕