ភ្នំពេញ – យោងតាមរបាយការណ៍បឋមរបស់អធិការដ្ឋាននគរបាលខណ្ឌដង្កោឱ្យដឹងថា ទឹកជំនន់ទឹកស្ទឹងព្រែកត្នោតក្នុងរយៈពេលប៉ុន្មានថ្ងៃនេះ បានធ្វើឱ្យជន់លិចផ្ទះប្រជាពលរដ្ឋចំនួនជាង២ពាន់ខ្នងស្ថិតក្នុងសង្កាត់ចំនួន១០សង្កាត់ ព្រមទាំងជន់លិចសាលារៀនចំនួន៣៥ខ្នង ផ្លូវចំនួន៣កន្លែង និងផ្ទៃដីកសិកម្មជាង១៥២ហិកតា ផងដែរ ។
បើតាមអាជ្ញាធរដែនដី និងមន្ត្រីជំនាញថ្លែងកាលពីថ្ងៃទី២៦ ខែតុលាថា ស្ថានភាពទឹកស្ទឹងព្រែកត្នោត នៅនឹង មិនមានការកើនឡើងបន្ថែមទៀតនោះទេ ដោយអាជ្ញាធរ មន្ត្រីជំនាញ និងសមត្ថកិច្ចកំពុងតែតាមដានយកចិត្តទុកដាក់អំពីស្ថានភាពទឹកជំនន់នៅស្ទឹងព្រែកត្នោត ដោយមានការប្រុងប្រយ័ត្នខ្ពស់បំផុត ក្នុងការត្រៀមរួចជាស្រេចជួយសង្គ្រោះប្រជាពលរដ្ឋកំពុងរងការគំរាមកំហែងដែលបង្កគ្រោះថ្នាក់ជាយថាហេតុណាមួយនោះ ។
សូមបញ្ជាក់ថា ទឹកជំនន់ស្ទឹងព្រែកត្នោតបានបង្កការជន់លិចផ្ទះ ដីកសិកម្ម សាលារៀនផ្លូវថ្នល់ក្នុងភូមិសាស្ត្រខណ្ឌដង្កោ គឺទឹកហូរធ្លាក់យ៉ាងគំហុកពីខេត្តកំពង់ស្ពឺ ចាប់ផ្តើមជន់លិចរយៈពេល២ទៅ៣ថ្ងៃចុងក្រោយនេះ ៕
