ភ្នំពេញ – យោងតាមសេចក្តីជូនដំនឹងរបស់រដ្ឋាករស្វយ័តដឹកជញ្ជូនសាធារណៈរថយន្តក្រុងរាជធានីភ្នំពេញបានឲ្យដឹងថា ចាប់ពីថ្ងៃទី២ ខែវិច្ឆិកា ឆ្នាំ២០២១ ខ្លួននឹងដាក់ឲ្យដំណើរការសាកល្បងសេវាដឹកជញ្ជូនសាធារណៈរថយន្តក្រុង និងកាណូតឡើងវិញ។
សម្រាប់រថយន្តក្រុង នឹងដំណើរការសាកល្បងចំនួន៥ខ្សែ គឺខ្សែទី១ ចេញពីស្ថានីយ៍ចំណតរថយន្តក្រុងព្រៃកព្នៅ ដល់ស្ថានីយ៍ចំណតរថយន្តក្រុងវាលស្បូវ, ខ្សែទី២ ចេញពីរង្វង់មូលគួចកាណុង ដល់ស្ពានព្រែកសំរោង ក្រុងតាខ្មៅ, ខ្សែទី៣ ចេញពីសួនឬស្សីកែវ ដល់បុរីសន្តិភាព២ តាមមហាវិថីសហព័ន្ធរុស្ស៊ី, ខ្សែទី៤A ចេញពីសួនឬស្សីកែវ ដល់បុរីសន្តិភាព២ តាមមហាវិថីសហព័ន្ធរុស្ស៊ី និង ខ្សែទី៤B ចេញពីសួនឬស្សីកែវ ដល់បុរីសន្តិភាព២ តាមមហាវិថីចោមចៅ។
សម្រាប់កាណូតវិញ ចេញពីស្ថានីយ៍ចំណតសួនឬស្សីកែវ ដល់ស្ថានីយ៍ក្រុងតាខ្មៅ។
បើតាមការបញ្ជាក់របស់រដ្ឋាករស្វយ័តដឹកជញ្ជូនសាធារណៈថា រដ្ឋបាលរាជធានីភ្នំពេញ អនុញ្ញាតិឱ្យជិះដោយមិនបង់ប្រាក់រយៈពេល ៦ថ្ងៃ ចាប់ពីថ្ងៃទី២ ដល់ថ្ងៃទី៧ ខែវិច្ឆិកា ឆ្នាំ២០២១។
យ៉ាងណាក៏ដោយ ការជិះរថយន្តក្រុង និងកាណូត អ្នកដំណើរទាំងអស់ ត្រូវតែគោរពតាមវិធានសុខាភិបាល ដោយត្រូវបង្ហាញប័ណ្ណចាក់វ៉ាក់សាំងសម្រាប់មនុស្សពេញវ័យ ពាក់ម៉ាស លាងដៃនិងអាល់កុល វាស់កម្តៅ ស្កេន QR-Code និងអង្គុយតាមកៅអីដែលបានរៀបចំ៕