សៀមរាប – ថ្លែងក្នុងឱកាសនាំយកអំណោយ សម្តេចតេជោជូនដល់លោកយាយ សុខ ផាត់ អាយុ៨៩ឆ្នាំ ដែលបានស្ម័គ្រចិត្តចាក់វ៉ាក់សាំងចំលេខរៀងទី១០លាន នៅសង្កាត់ស្លក្រាម ក្រុងសៀមរាប ខេត្តសៀមរាប នៅរសៀលថ្ងៃទី០២ ខែវិច្ឆិកា ឆ្នាំ២០២១នេះ លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ-១៩ ក្របខណ្ឌទូទាំងប្រទេស បានបញ្ជាក់ថា យើងមិនអាចបន្តរស់នៅក្នុងប្រអប់នៃជំងឺកូវីដ-១៩ បានទៀតទេ ព្រោះថាបើនៅបន្តទៀត នោះមិនយូរមិនឆាប់ យើងនឹងក្ស័យមិនខាន។
លោកជំទាវ ឱ វណ្ណឌីន រដ្ឋលេខាធិការក្រសួងសុខាភិបាល
លោកជំទាវវេជ្ជបណ្ឌិត បានពន្យល់ថា ៖ “ការបន្តរស់នៅក្នុងប្រអប់ នៃវីរុសកូវីដ-១៩ គឺស្មើនឹងរង់ចាំសេចក្តីស្លាប់ដូច្នេះដែរ ដូចនេះហើយទើបសម្តេចតេជោនាយករដ្ឋមន្ត្រី កាលពីពេលថ្មីៗនេះសម្រេចប្រកាសបើកឡើងវិញនូវដំណើរការសង្គមទាំងមូល ដើម្បីជំរុញការងើបឡើងវិញនៃសេដ្ឋកិច្ច ដែលនេះគឺជាការសម្រេចចិត្តក្នុងដំណាក់កាលមួយដ៏ត្រឹមត្រូវ និងឈ្លាសវៃបំផុត របស់សម្តេចតេជោ។ ហើយបន្ថែមពីនោះ គឺជាអ្វីដែលយើងត្រូវរៀនសូត្រ រៀនរស់នៅជាមួយវត្តមានវីរុសកូវីដ-១៩ ក្នុងបរិបទនៃការប្រយុទ្ធប្រឆាំងការរាតត្បាតជាមួយនឹងជំងឺនេះ”។
លោកជំទាវ ក៏បានបន្តផងដែរថា កម្ពុជាយើងមិនអាចបន្តសំងំស្ងៀមនោះទេ ដោយត្រូវធ្វើយ៉ាងណាក៏ដោយ ត្រូវតែរៀនសូត្រពីវីរុសនេះផង រៀនពីវិធីគ្រប់គ្រងផង និងត្រូវតែរកវិធីដើម្បីដើរចេញពីប្រអប់វីរុសនេះផង ដែលនេះជាចំណុចល្អមួយ ដែលយើងទាំងអស់គ្នាទន្ទឹងរង់ចាំ បន្ទាប់ពីយុទ្ធនាការចាក់វ៉ាក់សាំងបានទទួលជោគជ័យ ដោយអាចស្រោចស្រពទូទាំងប្រទេសដល់ក្រុមគោលដៅទាំងអស់។
បន្ថែមពីនេះ លោកជំទាវវេជ្ជបណ្ឌិត ក៏បានអំពាវនាវ ដល់បងប្អូនប្រជាពលរដ្ឋ ត្រូវចេះទទួលខុសត្រូវដោយខ្លួនឯង និងសហគមន៍ត្រូវចូលរួមចំណែក នៅក្នុងការចូលរួមអនុវត្តវិធានការសុខាភិបាលឱ្យបានត្រឹមត្រូវ និងម៉ត់ចត់ផងដែរ បន្ទាប់ពីប្រទេសរបស់យើងបានវិលត្រលប់មកកាន់ប្រក្រតីភាពថ្មី តាមបែបគន្លងថ្មី ដោយមិនត្រូវធ្វេសប្រហែស ឬយល់ច្រឡំ ឬបោះបង់ចោល ដោយភ្លេចអនុវត្តវិធានការការពារខ្លួន ជាពិសេសគឺ ០៣កុំ និង០៣ការពារនោះទេ៕
