តាកែវ – នៅរសៀលថ្ងៃទី១២ ខែវិច្ឆិកា ឆ្នាំ២០២១នេះ អាជីវករផ្សារតាកែវរាប់សិបនាក់បានលើកគ្នាមកកាន់សាលាខេត្ត ក្នុងបំណងចង់ជួបលោក អ៊ូច ភា អភិបាលខេត្តតាកែវ ដើម្បីឲ្យលោកបកស្រាយករណីអនុញ្ញាតឲ្យក្រុមហ៊ុនមួយសាងសង់ផ្សារតាកែវថ្មី ខណៈក្នុងជំនួបជាមួយប្រជាពលរដ្ឋកាលពីលើកមុន លោកប្រាប់ក្រុមអាជីវករថា មិនបានអនុញ្ញាតឲ្យក្រុមហ៊ុនណាមួយមកសង់ផ្សារតាកែវឡើងវិញនោះឡើយ។
យ៉ាងណាក៏ដោយ លោក អ៊ូច ភា មិនបានចេញមកជួបក្រុមអាជីវករឡើយ ដោយប្រាប់ឲ្យក្រុមអាជីវករទាំងនោះជ្រើសរើសតំណាងមកជួបលោក។
គួររំលឹកថា កាលពីពាក់កណ្តាលខែតុលា ឆ្នាំ២០២១ ក្នុងជំនួបតទល់ជាមួយក្រុមអាជីវករផ្សារតាកែវ លោក អ៊ូច ភា អភិបាលខេត្តតាកែវបានថ្លែងថា លោកមិនដែលចេញលិខិតអនុញ្ញាតឲ្យមានការរុះរើ និងសាងសង់ផ្សារតាកែវថ្មីនោះទេ ដូច្នេះធ្វើម្តេចលោកអាចចេញលិខិតលុបចោលការសាងសង់នោះ ។ លោកថា ទាល់តែមានការសិក្សា និងស្រង់មតិយោបល់ពីបងប្អូនអាជីវករជាមុនសិន ទើបការសាងសង់អាចធ្វើទៅបាន ។
ប៉ុន្តែកាលពីពេលថ្មីៗនេះ សម្រាប់តែបែកធ្លាយនូវឯកសារជាលិខិតរបស់ក្រសួងសេដ្ឋកិច្ច និងហិរញ្ញវត្ថុ និងមួយទៀតជាលិខិតអនុញ្ញាតឲ្យមានការសាងសង់បោះត្រាយល់ព្រមដោយលោក អ៊ូច ភា អភិបាលខេត្តតាកែវ បានបង្ហាញថា ផ្សារតាកែវ ដែលមានទីតាំងស្ថិតនៅភូមិថ្នល់បែក សង្កាត់រការក្រៅ ក្រុងដូនកែវ ត្រូវបានស្នើធ្វើការវិនិយោគ ដោយមានឈ្មោះ ប្រាក់ ចាន់រដ្ឋា ជាម្ចាស់គម្រោង។
ដោយសារតែឯកសារទាំងនេះហើយ ទើបក្រុមអាជីវករបានលើកគ្នាមកមកសុំជួបលោក អ៊ូច ភា អភិបាលខេត្តតាកែវ ដើម្បីធ្វើការបកស្រាយ និងសុំអន្តរាគមន៍ ដោយថា ការសាងសង់ផ្សារថ្មីនេះ នឹងធ្វើឲ្យពួកគាត់ជាក្រុមអាជីវករជួបបញ្ហាលុយកាក់យ៉ាងធ្ងន់ធ្ងរ ដោយអ្នកវិនិយោគថ្មី គេលក់តូបរបស់ពួកគាត់ម្តងទៀតក្នុងតម្លៃថ្លៃ៕
