លោកឧត្តមសេនីយ៍ទោ អូត ស៊ីវត្ថា ស្នងការនគរបាលខេត្តស្ទឹងត្រែងបានប្រាប់អ្នកសារព័ត៌មានក្នុងស្រុកនៅរសៀលថ្ងៃទី២៥ ខែវិច្ឆិកា ឆ្នាំ២០២១ថា គ្រឿងញៀនចំនួន១០បាវស្មើ១៧០កញ្ចប់ដែលសមត្ថកិច្ចយាមល្បាតនៅតំបន់ព្រំដែនបង្ក្រាបបាន នៅភូមិសាស្ត្រកោះល្ង ឃុំព្រះរំកិល ស្រុកបុរីអូរស្វាយសែនជ័យ ខេត្តស្ទឹងត្រែងនៅវេលាម៉ោង៧យប់ថ្ងៃទី ២៤ខែវិច្ឆិកា។ ពេលនេះសមត្ថកិច្ចកំពុងតាមចាប់ជនជួញដូរគ្រឿងញៀន ខណៈជនសង្ស័យពាក់ព័ន្ធនឹងការដឹកជញ្ជូនគ្រឿងញៀនកំពុងរត់គេចខ្លួន។
គ្រឿងញៀនទាំងអស់ ក្រោយពីបញ្ជូនមកដល់ស្នងការដ្ឋាននគរបាលខេត្តស្ទឹងត្រែងទាំងយប់មកដល់រសៀលថ្ងៃទី២៥ ខែវិច្ឆិកានេះ គណៈកម្មការត្រួតពិនិត្យគ្រឿងញៀនមានការចូលរួមពីលោកស្វាយ សំអ៊ាង អភិបាលខេត្តស្ទឹងត្រែងលោកជា សុភ័ក្ត្រ តំណាងអយ្យការអមសាលាដំបូងខេត្ត លោកឧត្តមសេនីយ៍ទោ អូត ស៊ីវុត្ថាស្នងការនគរបាលខេត្តពិនិត្យមើលដោយផ្ទាល់ក្រោយពីបង្ក្រាបបាននោះ។
ជាលទ្ធផលគ្រឿងញៀនដែលបង្ក្រាបបានចំនួន១៧០ដុំមានទម្ងន់ ១៦៦គីឡូក្រាមដែលតាមការពិសោធន៍បឋមឃើញថា គឺជាប្រភេទមេតំហ្វេតាមីន៕
