ភ្នំពេញ – ក្រសួងអប់រំ យុវជន និងកីឡា បានប្រើប្រាស់ថវិកាប្រមាណ ២ម៉ឺនលានរៀល ឬស្មើនឹងប្រមាណជាង ៥លានដុល្លារ សម្រាប់ដំណើរការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុបឆ្នាំ២០២១នេះ។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា បានបញ្ជាក់ថា ការចំណាយទាំងនេះ ផ្តោតសំខាន់គឺប្រាក់ឧបត្ថម្ភលើគណៈកម្មការនានា ក្នុងកិច្ចដំណើរការប្រឡង ដែលមាន៤ដំណាក់កាល គឺការតាក់តែងប្រធានវិញ្ញាសា ពេលសំណេរ ពេលកំណែ និងបូកស្រង់ដោយកុំព្យូទ័រ។
ចំណែកឥណទានថវិកាឆ្នាំ២០២១ សម្រាប់ទ្រទ្រង់ក្នុងកិច្ចដំណើរការក្រសួងអប់រំ យុវជន និងកីឡាផ្នែកចំណាយចរន្តមានចំនួន ៥៨៧ ៧៤៧ លានរៀល(មិនបញ្ចូលបន្ទុកបុគ្គលិក)។
គួរបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុបឆ្នាំនេះ បានប្រព្រឹត្តទៅកាលពីថ្ងៃទី២៧-២៨ ខែធ្នូ ឆ្នាំ២០២១ ដោយមានបេក្ខជនដាក់ពាក្យប្រឡងចំនួន១១៤ ១៨៣នាក់ ។ បើគ្មានការប្រែប្រួលទេ លទ្ធផលនៃការប្រឡងនេះ ត្រូវបានប្រកាសនៅថ្ងៃទី១៨ ខែមករា ឆ្នាំ២០២២ខាងមុខ សម្រាប់រាជធានីភ្នំពេញ និងខេត្តកណ្តាល ហើយនៅថ្ងៃទី១៩ ខែមករា ឆ្នាំ២០២២ សម្រាប់បណ្តាខេត្ត ទូទាំងប្រទេស៕
