ភ្នំពេញ – ក្នុងពិធីប្រគល់រថយន្តដល់មន្រ្តីនគរបាលព្រំដែន កាលពីថ្ងៃអង្គារ (២៥ មករា) សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានលើកឡើងថា នៅប៉ុន្មានខែចុងក្រោយនេះ មានសារធាតុញៀនរាប់តោនបានដឹកចូលមកតាមច្រកកម្ពុជាដោយស្របច្បាប់ ហើយខ្លះទៀតនាំចូលដោយលួចលាក់។
សម្តេច ស ខេង រដ្ឋមន្រ្តីក្រសួងមហាផ្ទៃ
បើតាមសម្តេចក្រឡាហោម សារធាតុញៀនដែលត្រូវគេនាំចូលនោះ គឺដោយសារមានការធ្វេសប្រហែសពីមន្ត្រីពាក់ព័ន្ធមួយចំនួនដែលអនុញ្ញាតឲ្យមានការនាំចូលដោយស្របច្បាប់។
«សុំឱ្យក្រសួងដែលជាក្រសួងអាជ្ញាបណ្ណ, ខ្ញុំនិយាយប៉ុណ្ណឹង ដោយខ្ញុំមិនបាច់និយាយឈ្មោះទេ ដឹងហើយក្រសួងអាជ្ញាបណ្ណ។ សូមឯកឧត្តមរដ្ឋមន្ត្រី មើលរឿងហ្នឹង បើមិនអ៊ីចឹងទេ ឯកឧត្តមនឹងជាប់ជំពាក់ទទួលខុសត្រូវចំពោះសង្គមកម្ពុជា ទាក់ទងនឹងការបំផ្លាញសុខភាពសាធារណៈ។ ហើយអាជ្ញាធរគ្រឿងញៀន ក៏ដូចគ្នាដែរ ត្រូវតែមើលរឿងហ្នឹងឱ្យបានច្បាស់លាស់»។
សារធាតុញៀនដែលរឹបអូសបានកន្លងមក
បើយោងតាមរបាយការណ៍របស់គណៈកម្មការប្រឆាំងគ្រឿងញៀន បានឲ្យដឹងថា នៅក្នុងឆ្នាំ២០២១ អាជ្ញាធរបានបង្រ្កាបបទល្មើសគ្រឿងញៀនទូទាំងប្រទេសបានចំនួន៦២៤២ករណី ដោយឃាត់មនុស្សដែលពាក់ព័ន្ធនឹងគ្រឿងញៀនបានចំនួន១៣៧៦៥នាក់ និងរឹបអូសបានគ្រឿងញៀនចំនួន៤៤៣៥គីឡូក្រាម,កញ្ឆា ៥២២១៤ដើម និង កញ្ឆាស្ងួតជាង១៤១គីឡូក្រាម៕
