តាកែវ – បង្គោលថ្មដែលបានដាំវាទីយកដីលិចទឹករបស់រដ្ឋ នៅចំណុចដៃអូរស្ថិតនៅភូមិរំចេក ឃុំត្នោត ស្រុកបាទី ខេត្តតាកែវ ប្រមាណជាង២០ហិកតា ត្រូវបានក្រុមអាជ្ញាធរចុះធ្វើការដកចេញហើយ ក្រោយពីមានបញ្ជារបស់លោក ភួន ឈីម អភិបាលស្រុកបាទី ប៉ុន្តែម្ចាស់បង្គោលថ្ម ដែលគេដឹងថាជាអ្នកមានលុយចំនួន២នាក់រស់នៅរាជធានីភ្នំពេញ គេមិនទាន់ដឹងថា តើអាជ្ញាធរនឹងចាត់វិធានការយ៉ាងណានោះទេ។
គួររំលឹកថា កាលពីថ្ងៃទី២៥ ខែមករា ឆ្នាំ២០២២ ក្រោយពីទទួលដំណឹងថា មានការបោះបង្គោលព័ទ្ធរំលោភយកដីរំដោះទឹករបស់រដ្ឋនៅចំណុចភូមិរំចេក ឃុំត្នោត ស្រុកបាទី លោក ភួន ឈីម អភិបាលស្រុកបាទី បានធ្វើការជូនដំណឹងទៅដល់អ្នករំលោភបំពានទាំងនោះ ដោយទុករយៈពេល១៥ថ្ងៃ ដើម្បីឲ្យម្ចាស់បង្គោលថ្មដែលបានដាំមកដកចេញដោយខ្លួនឯង ប៉ុន្តែរហូតមកដល់ថ្ងៃម្សិលមិញ មិនមានម្ចាស់ដីណាចេញមុខមកដក ទើបរដ្ឋបាលឃុំត្នោត បានដឹកនាំកម្លាំងដោយមានលោកមេភូមិ និងប្រជាការពារភូមិរំចេក ចុះដកបង្គោលថ្មដោយខ្លួនឯង។
បើតាមការបញ្ជាក់របស់លោកអភិបាលស្រុកនៅព្រឹកមិញថា បង្គោលថ្មចំនួន២៩ដើមត្រូវបានដកយកមករក្សាទុកនៅសាលាឃុំត្នោត រីឯបង្គោលថ្មជាច្រើនដើមទៀត រដ្ឋបាលឃុំនឹងដឹកនាំកម្លាំងចុះដកបន្តនៅរដូវទឹកស្រក។
យ៉ាងណាក៨ដោយ សម្រាប់អ្នកទិញនិងអ្នកលក់ដីសាធារណៈរបស់រដ្ឋវិញ លោកអភិបាលស្រុកមិនបានបញ្ជាក់ថា តើលោកនិងចាត់ការតាមផ្លូវច្បាប់ដែរឬយ៉ាងណាទេ?
បើយោងតាមមាត្រា២៥៥ ជនណាលួចលក់ ឬបញ្ចាំ ទ្រព្យដែលមិនមែនជាកម្មសិទ្ធិរបស់ខ្លួន ត្រូវផ្ដន្ទាទោសដាក់ពន្ធនាគារពី៦ខែដល់៣ឆ្នាំ ដោយមិនគិតដល់ព្យុសនកម្ម ដែលបណ្ដាលមកពីអំពើរបស់ខ្លួន។
បើតាមការបញ្ជាក់របស់ប្រជាពលរដ្ឋថា ដីលិចទឹករបស់រដ្ឋនៅចំណុចដៃអូរស្ថិតនៅភូមិរំចេក ឃុំត្នោត ស្រុកបាទី ខេត្តតាកែវ ទំហំប្រមាណជាង២០ហិចតា ត្រូវបានអ្នកស្រី ភឿង សុខហួង និងប្អូនស្រីឈ្មោះ ភឿង សុខម៉េង ដើរបញ្ចុះបញ្ចូលទិញពីប្រជាពលរដ្ឋ ហើយដោយសារពលរដ្ឋមានការខ្វះខាតក្នុងគ្រួសារផង ពួកគេក៏ចាប់ផ្តើមលក់ដីលិចទឹករបស់រដ្ឋជាបន្តបន្ទាប់រហូតមានការបោះបង្គោលវាទីយកដូចសព្វថ្ងៃនេះទៅ៕