តាកែវ – ករណីបោះបង្គោលថ្មវាទីយកដីលិចទឹករបស់រដ្ឋនៅចំណុចភូមិរំចេក ឃុំត្នោត ស្រុកបាទី ដែលធ្វើឲ្យមានការផ្អើលឆោឡោកាលពីចុងខែមករា គិតមកទល់ពេលនេះ ចៅហ្វាយស្រុកបាទី គឺលោក ភួន ឈីម មិនបានចាត់វិធានការណាមួយចំពោះអ្នករំលោភយកនោះឡើយ ដោយបានត្រឹមឲ្យអាជ្ញាធរឃុំចុះទៅដកយកបង្គោលថ្មនោះចេញតែប៉ុណ្ណោះ។
ការចុះដកបង្គោលថ្មចេញពីដីលិចទឹករបស់រដ្ឋនោះ បានធ្វើឡើងកាលពីថ្ងៃទី១០ ខែកុម្ភៈ ឆ្នាំ២០២២ ដឹកនាំដោយលោក អ៊ុក សំបូរ មេឃុំត្នោត ក្រោមការបញ្ជាពីលោកអភិបាលស្រុកបាទី ប៉ុន្តែគេដឹងថា នេះគ្រាន់តែជាការសម្តែងឲ្យមហាជនល្អមើល និងឡើងរបាយការណ៍ជាវិជ្ជមានទៅថ្នាក់លើប៉ុណ្ណោះ ខណៈទីតាំងដីលិចទឹករបស់រដ្ឋនៅចំណុចខាងលើនេះ គឺនៅតែមានការទន្ទ្រានដដែល។
មហាជនបានសម្តែងចម្ងល់ថា តើនេះជាកំហុសរបស់មេឃុំត្នោតមិនបានអនុវត្តតាមបញ្ជារបស់លោកចៅហ្វាយស្រុកបាទី ឬ ជាចេតនារបស់ លោក ភួន ឈីម អភិបាលស្រុកបាទី ក្នុងការលាក់បាំង ការមិនអនុវត្តតាមវិធានការច្បាប់ទៅលើជនខិលខូច ?
យ៉ាងណាក៏ដោយ ប្រជាពលរដ្ឋរស់នៅមូលដ្ឋានសំណូមពរដល់លោក អ៊ូច ភា អភិបាលខេត្តតាកែវ សូមមេត្តាពិនិត្យមើលករណីនេះផង ដើម្បីរក្សាដីលិចទឹករបស់រដ្ឋនេះទុកជាប្រយោជន៍រួម។
សូមបញ្ជាក់ដែរថា ការចុះដកបង្គោលថ្មរបស់អាជ្ញាធរឃុំត្នោតកាលពីថ្ងៃទី១០ ខែកុម្ភៈ នោះ គឺមានទាំងលោកមេភូមិ និងប្រជាការពារភូមិរំចេក បានចុះដកបង្គោលថ្មដែលឈ្មួញបានដាំក្នុងដៃអូរជាដីសាធារណ:រដ្ឋ បានចំនួន២៩ដើម យកមករក្សាទុកនៅសាលាឃុំត្នោត ដោយឡែកបង្គោលថ្មជាច្រើនដើមទៀតមិនត្រូវបានដកនោះទេ ក្រោមហេតុផលទុកដកនៅពេលទឹកស្រក ទាំងដែលបង្គោលថ្មទាំងនោះ មិនស្ថិតនៅក្នុងទឹកផង៕
