ភ្នំពេញ – ជាថ្មីម្តងទៀត នៅក្នុងកិច្ចប្រជុំតុមូល ស្តីពី «សន្ដិសុខ និងការការពារជាតិនៅតំបន់ឥណ្ឌូប៉ាស៊ីហ្វិក» ដែលធ្វើឡើងកាលពីថ្ងៃទី២២ ខែកុម្ភៈ ឆ្នាំ២០២២ នាទីក្រុងប៉ារីសប្រទេសបារាំង លោក ប្រាក់ សុខុន រដ្ឋមន្រ្តីក្រសួងការបរទេសកម្ពុជា បានបញ្ជាក់ថា ប្រទេសកម្ពុជាប្រកាន់នូវនយោបាយអព្យាក្រិត្យអចិន្ដ្រៃយ៍ ហើយរដ្ឋធម្មនុញ្ញកម្ពុជាក៏មិនអនុញ្ញាតឱ្យមានវត្តមានយោធាបរទេសនៅលើទឹកដីរបស់ខ្លួននោះទេ។
យោងតាមសេចក្តីប្រកាសព័ត៌មានរបស់ក្រសួងការបរទេសនៅថ្ងៃទី២៣ ខែកុម្ភៈ ឆ្នាំ២០២២ បានបញ្ជាក់ថា ក្នុងបទអន្តរាគមន៍ លោក ប្រាក់ សុខុន រដ្ឋមន្រ្តីការបរទេសកម្ពុជា បានលើកឡើងថា សមុទ្រចិនខាងត្បូង គឺពិតជាតំបន់មួយដែលមានសារៈសំខាន់ និងផលប្រយោជន៍លាយឡំគ្នាប្រកបដោយគ្រោះថ្នាក់។ លោកថា ប្រទេសដែលគួរជាអ្នកពាក់ព័ន្ធ គឺប្រទេសដែលកំពុងមានជម្លោះដណ្ដើមនូវអធិបតេយ្យភាពនៅផ្នែកណានោះនៃតំបន់សមុទ្រនេះទោះបីទឡ្ហីករណ៍ខាងផ្នែកច្បាប់ និងប្រវត្តិសាស្ដ្រដែលគេលើកឡើងដើម្បីធ្វើជាអំណះអំណាងនៃការទាមទាររបស់គេនោះយ៉ាងណាក៏ដោយ។
ប៉ុន្តែប្រទេសតូចដូចកម្ពុជា ក៏ត្រូវទទួលរងគ្រោះផងដែរ ដោយសារតែអ្វីទាំងអស់ដែលប្រទេសចិនធ្វើនៅក្នុងតំបន់នេះ ត្រូវបានសហរដ្ឋអាមេរិកតាមដាន និងវិភាគយ៉ាងល្អិតល្អន់នោះ សូម្បីតែកិច្ចសន្យារវាងកម្ពុជា និងចិននៅក្នុងការស្ដារ ជួសជុលនិងការធ្វើទំនើបកម្មមូលដ្ឋានទ័ពជើងទឹករាម ក៏បានក្លាយជាចំណុចកណ្ដាលនៃការចោទប្រកាន់នៃការដាក់សម្ពាធរហូតដល់ការគម្រាមកំហែងផងដែរ។ ក្នុងខណៈដែលការងារជួសជុលមូលដ្ឋាននេះកំពុងដំណើរការនៅឡើយ គេបានចោទប្រកាន់យើងរួចទៅហើយថា បានផ្តល់ឱ្យប្រទេសចិននូវតំបន់ផ្ដាច់មុខនៅក្នុងមូលដ្ឋាននេះ។
លោក ប្រាក់ សុខុន បញ្ជាក់ថា មូលដ្ឋាននេះគ្មានគោលដៅណាផ្សេងក្រៅពីការការពារដែនសមុទ្រ និងការពារអធិបតេយ្យ បូរណភាពទឹកដីរបស់កម្ពុជា ដែលជាញឹកញាប់ ត្រូវបានគេរំលោភបំពាន។ ក្នុងឋានៈជាប្រទេស អធិបតេយ្យ កម្ពុជាមានសិទ្ធគ្រប់យ៉ាងទាំងអស់នៅក្នុងការជ្រើសរើសមធ្យោបាយប្រកបដោយប្រសិទ្ធភាពបំផុតដើម្បីការពារប្រជាជាតិរបស់យើង។ ប៉ុន្តែយើងនឹងធ្វើការជ្រើសរើសមធ្យោបាយនោះដោយគោរពយ៉ាងម៉ឺងម៉ាត់បំផុតចំពោះរដ្ឋធម្មនុញ្ញរបស់យើង៕