តាកែវ – ករណីក្រុមក្មេងទំនើងមួយក្រុមដែលបានចូលទៅកាប់សិស្សសាលាវិទ្យាល័យហេងសំរិនព្រៃល្វាម្នាក់ ប៉ុន្តែជនរងគ្រោះរត់រួច ហើយក្រុមក្មេងទំនើងបានទៅវាយម៉ូតូជនរងគ្រោះបណ្តាលឱ្យខូចខាតយ៉ាងដំណំនោះ ឥឡូវនេះសមត្ថកិច្ចបានស្រាវជ្រាវចាប់បានជនសង្ស័យចំនួន៥នាក់ ក្នុងចំណោម៩នាក់។
បើតាមរបាយការណ៍របស់សមត្ថកិច្ច ហេតុការណ៍នេះបានកើតឡើងកាលពីវេលាម៉ោងប្រមាណ ៤រសៀល ថ្ងៃទី២២ ខែកុម្ភៈ ឆ្នាំ២០២២ ដោយក្រុមជនសង្ស័យបានជិះម៉ូតូចំនួន៤គ្រឿងប្រដាប់ដោយកាំបិត និងដាវ ហើយពេលមកដល់បរិវេណវិទ្យាល័យហេងសំរិនព្រៃល្វា ក៏បានធ្វើសកម្មភាពដេញកាប់ទៅលើជនរងគ្រោះឈ្មោះ សុខ សៀវតុង ភេទប្រុស អាយុ១៧ឆ្នាំ ខណៈជនរងគ្រោះកំពុងនិយាយគ្នាលេងជាមួយមិត្តភក្តិ តែជនរងគ្រោះមើលឃើញទាន់ ក៏បានរត់គេចខ្លួនចោលម៉ូតូ បន្ទាប់មកក្រុមជនសង្ស័យក៏បានកាប់ទៅលើម៉ូតូរបស់ជនរងគ្រោះបណ្តាលឱ្យខូចខាតបែកចង្កៀងមុខ បែកស្តុបក្រោយ ដាច់កន្ទុយក្រោយ និងកាច់ផ្លាកលេខម៉ូតូ ហើយក៏នាំគ្នាជិះម៉ូតូគេចខ្លួនបាត់។
មូលហេតុដែលនាំឱ្យមានការដេញកាប់ប្រហារនេះកើតឡើង សមត្ថកិច្ចបានបញ្ជាក់ថា គឺដោយសារក្រុមជនសង្ស័យធ្លាប់មានគំនុំជាមួយនឹងក្រុមក្មេងស្ទាវនៅព្រៃល្វា។
យ៉ាងណាក៏ដោយ ក្រោយពីមានបញ្ជាពីស្នងការនគរបាលខេត្តតាកែវ និងមានការសម្របសម្រួលពីព្រះរាជអាជ្ញាអសមសាលាដំបូងខេត្តតាកែវ កម្លាំងនគរបាលស្រុកព្រៃកប្បាស សហការជាមួយនគរបាលស្រុកកោះធំ បានស្រាវជ្រាវ និងឃាត់ខ្លួនជនសង្ស័យបានចំនួន៥នាក់ជាបន្តបន្ទាប់ ខណៈ ៤នាក់ទៀតរត់គេចខ្លួន។
ជនសង្ស័យទាំង៥នាក់នោះ ត្រូវបានបញ្ជាក់ថា ទី១.ឈ្មោះ រត់ គីមហុង អាយុ១៩ឆ្នាំ, ២.ឈ្មោះ លាងហុង សុងឈួន អាយុ១៦ឆ្នាំ, ៣.ឈ្មោះ គឿន សីហា អាយុ១៦ឆ្នាំ, ៤.ឈ្មោះ ឆៃ លីសែ អាយុ១៥ឆ្នាំ និង ៥ឈ្មោះ ម៉ុល វ៉េងឡុង អាយុ១៥ឆ្នាំ។
ក្នុងនោះសមត្ថកិច្ចក៏បានដកហូតវត្ថុតាងរួមមាន កាំបិតផ្គាក់ដងឈើមួយ, ម៉ូតូ១គ្រឿង យកមកកាន់អធិការដ្ឋាននគរបាលស្រុកព្រៃកប្បាសដើម្បីសាកសួរ និងកសាងសំណុំរឿងតាមនីតិវិធី ហើយចំណែកជនសង្ស័យចំនួន៤នាក់ដែលរត់គេចខ្លួន កម្លាំងសមត្ថកិច្ចកំពុងសហការបន្តស្រាវជ្រាវដើម្បីយមកចាត់ការតាមផ្លូវច្បាប់៕