(តាកែវ) ៖ ករណីលោក ទុន ឧត្តម ហៅហេង នាយរងការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តតាកែវ ដកកាំភ្លើងភ្ជង់សន្តិសុខកាស៊ីណូភ្នំដិនម្នាក់រឿងដណ្តើមស្រីស្នេហ៍នោះ ពេលនេះ គេរកឃើញថា លោកនាយរងរូបនោះមានពាក់ព័ន្ធនឹងករណីបង្ខាំងមនុស្សមួយករណីថែមទៀត។
បើតាមប្រភពពីសមត្ថកិច្ចស្រុកគីរីវង់ បានឲ្យដឹងថា មុននឹងកើតមានករណីដកកាំភ្លើងភ្ជង់សន្តិសុខកាស៊ីណូភ្នំដិន លោក ទុន ឧត្តម បានប្រាប់ឲ្យនារីម្នាក់ដែលជាអ្នកលក់កាហ្វេ និងជាគូដណ្តឹងរបស់បុរសសន្តិសុខកាស៊ីណូភ្នំដិន កុម្មង់ម្ហូប និងយកម្ហូបនោះទៅឲ្យខ្លួននៅក្នុងបន្ទប់ផ្ទះសំណាក់មួយ។ ក្រោយពីនារីរូបនោះយកម្ហូបទៅដល់ លោក ទុន ឧត្តម បានបិទទ្វារ និងដកហូតទូរស័ព្ទស្រីរូបនោះ ព្រមទាំងភ្ជង់សម្លុត និងបង្ខាំងនៅក្នុងបន្ទប់នោះថែមទៀត។
ដោយសារតែករណីនេះហើយ ទើបឈានដល់មានជម្លោះរវាងសន្តិសុខកាស៊ីណូភ្នំដិន ជាមួយលោក ទុន ឧត្តម នាយរងការិយាល័យព្រហ្មទណ្ឌកម្រិតស្រាល នៃស្នងការនគរបាលខេត្តតាកែវ រហូតឈានដល់ដកកាំភ្លើងភ្ជង់បុរសរសន្តិសុខ ព្រមទាំងគំរាមសម្លាប់ថែមទៀត។
សូមបញ្ជាក់ថា រឿងរ៉ាវទាំងនេះ បានកើតឡើងកាលពីថ្ងៃទី២៣ ខែមេសា ឆ្នាំ២០២២កន្លងទៅ ក្រោយពីសន្តិសុខម្នាក់ឈ្មោះ ធា គីរី អាយុ៤២ឆ្នាំ បានដាក់ពាក្យបណ្តឹងមកសមត្ថកិច្ច ករណីលោក ទុន ឧត្តម ហៅហេង អាយុ៥០ឆ្នាំ មានតួនាទីជានាយរងការិយាល័យព្រហ្មទណ្ឌកម្រិតស្រាល នៃស្នងការនគរបាលខេត្តតាកែវ បានប្រើអំណាច ដោយដកកាំភ្លើងខ្លីភ្ជង់ខ្លួន និងគំរាមសម្លាប់។ ក្រោយពីការសាកសួររបស់សមត្ថកិច្ច ធ្វើបានធ្លាយដល់រឿងលោក ទុន ឧត្តម ជាប់ពាក់ព័ន្ធដល់ករណីបង្ខាំងមនុស្សខុសច្បាប់ថែមទៀត។
លោក ទុន ឧត្តម ហៅហេង នេះ ត្រូវគេដឹងថា គឺជាបុគ្គលដែលមានរឿងល្បីល្បាញខាងបាញ់បោះសេរី អស់៣ជំនាន់ស្នងការខេត្តតាកែវហើយ ដោយគេមិនឃើញបុគ្គលរូបនេះ មានទោសពៃរ៍អ្វីឡើយ ។ ហើយពេលនេះ សាធារណៈជនកំពុងរង់ចាំមើលថា តើបុគ្គលរូបនេះ អាចរួចខ្លួនទៀត ដែរ ឬយ៉ាងណា?៕