(ព្រៃវែង) ៖ បើតាមសេចក្តីរាយការណ៍បានឲ្យដឹងថា នៅថ្ងៃទី១២ ខែមិថុនា ឆ្នាំ ២០២នេះ កម្លាំងនៃអគ្គនាយកដ្ឋានសុខភាពសត្វ និងផលិតផលសត្វ បានចុះបង្រ្កាបករណីនាំចូលសត្វជ្រូករស់ខុសច្បាប់ពីប្រទេសវៀតណាម នៅចំណុចផ្លូវជាតិលេខ១ ស្ថិតនៅម្ដុំកំពង់ត្របែក តែមិនបានប៉ុន្មានផង ស្រាប់តែមានកងកម្លាំងមួយក្រុម ជិះរថយន្ដពាក់ផ្លាកលេខ ខ.ម មកធ្វើអន្ដរាគមន៍ដោះលែងរថយន្តដឹកជ្រូកទៅបាត់។
គួរបញ្ជាក់ដែរថា បញ្ហានៃការនាំចូលជ្រូករស់ខុសច្បាប់ពីបណ្ដាប្រទេសជិតខាង នៅតែជាបញ្ហាប្រឈម បើទោះបី កន្លងមក ក្រសួងកសិកម្ម រួមទាំង ស្ថាប័នពាក់ព័ន្ធ បានរួមគ្នាធ្វើកិច្ចការច្រើនមកហើយលើរឿងនេះ ពិសេសការលើកកម្ពស់ការចិញ្ចឹមក្នុងស្រុក និងទប់ស្កាត់ការនាំចូលជ្រូករស់ក៏ដោយ។
ទោះយ៉ាងណា បច្ចុប្បន្ននេះ សកម្មភាពនៃការនាំចូលសត្វជ្រូក និងសាច់ជ្រូក ដោយខុសច្បាប់ពីប្រទេសជិតខាង នៅតែមានបន្ដកើតមានជាហូហែរដដែល ពិសេសការនាំចូលពីប្រទេសវៀតណាម តាមច្រករបៀងមួយចំនួន ក្នុងខេត្តស្វាយរៀង ដែលជាខេត្តជាប់ព្រំប្រទល់ប្រទេសវៀតណាមតែម្ដង៕
