បន្ទាយមានជ័យ : សមត្ថកិច្ចឲ្យដឹងថា គេបានឃាត់ខ្លួនអ្នកសារព័ត៌មានម្នាក់តាមដីកាតុលាការបន្ទាប់ពីមានពាក្យបណ្ដឹងរបស់ឈ្មួញឈើ និងមន្ត្រីបរិស្ថាន ។
លោក សិទ្ធិ ឡោះ ស្នងការនគរបាលខេត្តបន្ទាយមាន ជ័យ បានថ្លែងប្រាប់ក្រុមអ្នករាយការណ៍ព័ត៌មានកាល ពីថ្ងៃទីប១២បកក្កដាម្សិល មិញថា ដោយសហការជាមួយនគរបាលខេត្តកំពង់ធំគេបានចាប់ខ្លួនឈ្មោះ ហ៊ាង លីហាក់ ភេទប្រុស អាយុ៥២ឆ្នាំ ជាអ្នកសារព័ត៌មាន មានទីលំនៅបច្ចុប្បន្នភូមិកំពង់ចិន ឃុំកំពង់ចិនត្បូង ស្រុកស្ទោង ខេត្តកំពង់ធំ កាលពីម៉ោង៨យប់ថ្ងៃទី១១ ខែ កក្កដា ឆ្នាំ២០២២ នៅផ្ទះសំណាក់មួយក្នុងក្រុងប៉ោយប៉ែត ខេត្តបន្ទាយមានជ័យ ។ លោកថា ការចាប់ខ្លួននេះធ្វើតាមដីកាបង្គាប់ឲ្យនាំខ្លួនរបស់តុលាការខេត្តកំពង់ធំពាក់ព័ន្ធទៅនឹងអង្គហេតុមួយប្រព្រឹត្តកាលពីអំឡុងឆ្នាំ២០២០ ដែលដើមចោទគឺឈ្មួញរកស៊ីឈើនិងមន្ត្រីបរិស្ថានចោទឈ្មោះ ហ៊ាង លីហាក់ ពីបទជំរិតទារប្រាក់ ឬកំហែងយក ។
សូមបញ្ជាក់ថា ជារឿយៗក្រុមអង្គការសង្គមស៊ីវិលក៏ដូចជាអ្នកកាសែតតែតែងភ្ជាប់វិនាសកម្មព្រៃឈើដ៏អាក្រក់នៅកម្ពុជាទៅនឹងមន្ត្រីបរិស្ថាន មន្ត្រីព្រៃឈើ និងឈ្មួញឈើ ហើយជាញយដងក៏មានការតបមកវិញតាមរយៈការចាត់វិធានការច្បាប់ដោយប្រព័ន្ធតុលាការផងដែរទៅលើពួកអ្នករិះគន់ទាំងនោះបើទោះបីជាពួកគេបានបង្ហាញនូវតម្រុយគួរឲ្យសង្ស័យនៃបទល្មើសយ៉ាង ណាក្ដី ដែលវាជាការផ្ដល់លទ្ធភាពឱ្យមានការបន្តកាប់បំផ្លាញព្រៃឈើខ្មែរតាមរបៀបជិះសេះលែងដៃ ៕