ភ្នំពេញ: រយៈពេល៥ខែចុងក្រោយនេះ(មករា-ឧសភា)អាមេរិកបានក្លាយជាប្រទេសទី១សម្រាប់ការនាំចេញទំនិញរបស់កម្ពុជា ខណៈវៀតណាមលេខ២ និងចិនលេខ៣ ។ នេះបើយោងតាមរបាយការណ៍ដែលចេញដោយអគ្គនាយកដ្ឋានគយ និងរដ្ឋាករ ។
ស្ថាប័ននេះបានបញ្ជាក់ថា រយៈពេល៥ខែចាប់ពីខែ មករា ដល់ ខែឧសភា ឆ្នាំ២០២៣ កម្ពុជានាំទំនិញទៅកាន់ទីផ្សារពិភពលោកមានទំហំទឹកប្រាក់៩,១៨៣លានដុល្លារ ។ ក្នុងនោះសហរដ្ឋអាមេរិកជាប់លំដាប់លេខ១ មានទំហំជិត ៣ ១៩៨លានដុល្លារ ។ លំដាប់ពី២ទីផ្សារប្រទេសវៀតណាមមានទំហំនាំចេញជាង១៣២៣លានដុល្លារ និងលំដាប់លេខ៣ គឺជាប្រទេសចិនដែលមានទំហំនាំចេញជិត ៥៨៩លានដុល្លារ។
សូមបញ្ជាក់ថា កាលពីឆ្នាំ២០២២ ពាណិជ្ជកម្មទ្វេភាគីកម្ពុជា-សហរដ្ឋអាមេរិកសម្រេចបានទំហំទឹកប្រាក់ ៩ ២៨១លានដុល្លារ ។ ចំណែកទំហំទឹកប្រាក់ដែលកម្ពុជានាំចូលពីអាមេរិកវិញគឺមានតែ១១៣លានដុល្លារ ប៉ុណ្ណោះ ៕