ភ្នំពេញ៖ តំបន់ទំនាបមួយចំនួនអមទន្លេមេគង្គ អាចរងការជន់លិច ដោយសារការហក់ឡើងនៃកម្រិតទឹកភ្លៀង ក្នុងអាងទន្លេមេគង្គ។ នេះបើតាមសេចក្ដីជូនដំណឹងរបស់ក្រសួងធនធានទឹក និងឧតុនិយម នៅថ្ងៃទី៣១ ខែ កក្កដា។
ក្រសួងបានព្យាករថា ឥទ្ធិពលប្រព័ន្ធសម្ពាធទាប (ITCZ) នឹងធ្វើឲ្យនៅតំបន់ផ្ទៃរងទឹកភ្លៀងនៃទន្លេមេគង្គ ក្នុងភូមិសាស្រ្តប្រទេសថៃ ឡាវ និងកម្ពុជា មានភ្លៀងធ្លាក់ច្រើននៅក្នុងអាងទន្លមេគង្គ។
ស្ថានភាពបែបនេះ នឹងបណ្ដាលឱ្យទឹកទន្លេមេគង្គហក់ឡើងក្នុងរយៈពេលពី ៣ទៅ៤ថ្ងៃខាងមុខ ជាពិសេសនៅភាគខាងលើនៃប្រទេសកម្ពុជា ដូចជា ខេត្តស្ទឹងត្រែង ទឹកនឹងអាចឡើងដល់កម្ពស់៧,៦៥ម៉ែត្រ, ខេត្តក្រចេះ ទឹកនឹងអាចឡើងដល់កម្ពស់១៦,៧០ម៉ែត្រ និងខេត្តកំពង់ចាម ទឹកនឹងអាចឡើងដល់កម្ពស់៩,៩០ម៉ែត្រ ។
ក្រសួងធនធានទឹក បញ្ជាក់ថា ការហក់ឡើងនេះ មិនទាន់ឈានដល់កម្រិតប្រកាសអាសន្ននៅឡើយទេ ប៉ុន្តែ ទឹកអាចលិចតំបន់ទំនាបមួយចំនួនអមដងទន្លមេគង្គ និងហូរចូលទៅតាមបណ្តាព្រែកមួយចំនួនផងដែរ។ ជាមួយគ្នានេះ ក្រសួង បានអំពាវនាវដល់សារធារណជនឱ្យបង្កើនការប្រុងប្រយ័ត្នខ្ពស់ ចំពោះគ្រោះទឹក ជំនន់នៅរដូវវស្សានេះ៕