មណ្ឌលគិរី៖ សាលាដំបូងខេត្តមណ្ឌលគិរីនាថ្ងៃទី ០១ សីហា នេះបានសម្រេចឃុំខ្លួនបណ្ដោះអាសន្នអតីតអភិបាលស្រុកអូររាំងពីបទថា បានចេញសែកស្អុយ ឬមូលប្បទានបត្រ(ពុំមានសាច់ប្រាក់) និងលួចកាន់កាប់អចលនទ្រព្យអ្នកដទៃ ។
ជនសង្ស័យឈ្មោះ នង ទុណ្ណារី ត្រូវបានសមត្ថកិច្ចកង រាជអាវុធហត្ថឃាត់ខ្លួនកាលពីថ្ងៃ៣០ កក្កដា ចុងខែកន្លងទៅពាក់ព័ន្ធបទចោទប្រកាន់ខាងលើ ។
លោក មាស ប្រុស អ្នកនាំពាក្យសាលាដំបូងខេត្ត មណ្ឌលគិរី បានបញ្ជាក់ប្រាប់ក្រុមអ្នករាយការណ៍ព័ត៌មានថា ច្បាប់ស្តីពីឧបករណ៍អាចជួញដូរបាន និង ប្រតិបត្តិការទូទាត់ ការចេញសែកស្អុយឬ មូលប្បទានបត្រ(ពុំមានសាច់ប្រាក់) ត្រូវផ្តន្ទាទោសពិន័យជាប្រាក់ពី២លានដល់៦លានរៀល និងត្រូវផ្តន្ទាទោសជាប់ពន្ធនាគារពី១ឆ្នាំ ទៅ៣ឆ្នាំ , នេះដោយមិនទាន់គិតដល់ កាតព្វកិច្ចទូទាត់សងចំនួនប្រាក់ នៃឧបករណ៍អាចជួញ ដូរបាននោះទៅជនរងគ្រោះផង ៕