ព្រះសីហនុ៖ មានករណីគ្រោះថ្នាក់ចរាចរណ៍មួយបានកើតឡើង នៅព្រឹក ថ្ងៃទី៥ ខែមករា ឆ្នាំ២០២៤ រវាងរថយន្តបុកប៉ះជាមួយរថយន្ត នៅតាមបណ្តោយផ្លូវ ៤០ម៉ែត្រ ផ្លូវលេខ ៨៣៥ ស្ថិតនៅក្នុងភូមិ៦ សង្កាត់៤ ក្រុងព្រះសីហនុ ខេត្តព្រះសីហនុ បណ្តាលឲ្យជនជាតិចិនចំនួន ៤នាក់បានរងរបួសធ្ងន់ស្រាល។
យោងតាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេបានឃើញរថយន្តមួយគ្រឿងម៉ាក Starix ពណ៌ខ្មៅ ពាក់ស្លាកលេខ ភ្នំពេញ 2BA-7808 បើកបរដោយបុរសម្នាក់ក្នុងល្បឿនលឿន។ លុះមកដល់ចំណុចកើតហេតុបានឡើងវ៉ាជេងរថយន្តមួយគ្រឿងម៉ាក Tundra ពណ៌ខ្មៅ ពាក់ស្លាកលេខ ភ្នំពេញ 2BF-1134 ក្រោយមកក៏បានជ្រុលទៅបុកនិងរថយន្តមួយគ្រឿងទៀតម៉ាក RangRover ពណ៌ស ពាក់ស្លាកលេខ ភ្នំពេញ 2AW-7575 ក្នុងទិសដៅផ្ទុយគ្នា ចំពីមុខយ៉ាងពេញទំហឹង និងរេមកប៉ះគ្នាជាមួយរថយន្តTundraខាងលើ ដែលបើកបរស្របទិសគ្នាបន្ថែមទៀតផងដែរ។
ក្រោយពេលកើតហេតុភ្លាមៗ នោះជនរងគ្រោះត្រូវបានបញ្ជូនយកទៅសង្គ្រោះបន្ទាន់នៅមន្ទីរពេទ្យឯកជនពេទ្យចិនមួយកន្លែងក្នុងក្រុងព្រះសីហនុ ។
បច្ចុប្បន្ន សមត្ថកិច្ចនគរបាលចរចារណ៍ផ្លូវគោក បានចុះមកជួយសម្រួលចរាចរណ៍នៅកន្លែងកើតហេតុ និងធ្វើការវាស់វែង រួចស្ទួចយកវត្ថុតាងរថយន្តខាងលើយកទៅរក្សាទុកនៅការិយាល័យនគរបាលចរាចរណ៍ផ្លូវគោកខេត្តព្រះសីហនុ រងចាំធ្វើការដោះស្រាយបន្ត តាមនីតិវិធីច្បាប់៕ ដោយ ដែនសមុទ្រ
