វ៉ាស៊ីនតោន៖ អំឡុងសង្ខេបព័ត៌មានមួយកាលពីថ្ងៃទី២៣ ខែមេសា ប្រធានាធិបតីអាមេរិក ដូណាល់ ត្រាំ បានថ្លែងថា ការផ្សាយរបស់ CNN កាលពីថ្ងៃទី២០ ខែមេសា ស្តីអំពី មេដឹកនាំកូរ៉េខាងជើង គីម ជុងអ៊ុន បាននិងកំពុងស្ថិតនៅក្នុងស្ថានភាពឈឺធ្ងន់ធ្ងរនោះ គឺជាព័ត៌មានមិនត្រឹមត្រូវ ។
លោកបានបន្ថែមថា «ខ្ញុំគិតថា ការផ្សាយនោះមិនពិត ។ ខ្ញុំគិតថា ការផ្សាយនោះមានទាក់ទងជាមួយបណ្តាញមួយដែលមិនមានការពិត ។ ខ្ញុំបាននិងកំពុងឮថា ពួកគេប្រើប្រាស់ព័ត៌មានចាស់…ខ្ញុំសង្ឃឹមថា វាជាការផ្សាយព័ត៌មានមិនពិត» ។
នៅពេលត្រូវបានគេសួរថា តើមានបានទាក់ទងទៅកូរ៉េខាងជើងដែរឬទេ, លោកត្រាំ បានបដិសេធផ្តល់ចម្លើយ ។ ប៉ុន្តែបានថ្លែងថា «ទំនាក់ទំនងអាមេរិកជាមួយកូរ៉េខាងជើង គឺ ល្អ » ។ លោកបានបញ្ជាក់ជាថ្មីថា រវាងលោក និងមេដឹកនាំ គីម មានទំនាក់ល្អនឹងគ្នា ហើយលោកសង្ឃឹមថា គាត់(គីម ជុងអ៊ុន) មិនមានបញ្ហាអ្វីកើតឡើងទៅចុះ»។
សូមរំលឹកថា កាលពីថ្ងៃទី២០ ខែមេសា ឆ្នាំ២០២០ បណ្ដាញព័ត៌មាន CNNបានដកស្រង់ប្រភពពីមន្ត្រីCIAមិនបញ្ចេញឈ្មោះមកផ្សាយថា អាមេរិកកំពុងពិនិត្យមើលព័ត៌មានចារកម្ម ដែលបានអះអាងថា លោក គីម ជុងអ៊ុន កំពុងស្ថិតនៅក្នុងស្ថានភាពសុខភាពធ្ងន់ធ្ងរ ក្រោយពីការវះកាត់ ៕ កែវ រស្មី