(ចិន) – អគ្គនាយកមជ្ឈមណ្ឌលការពារនិងកំចាត់ជំងឺ (CDC) របស់ប្រទេសចិន គឺលោកវេជ្ជបណ្ឌិត Gao Fu បានមានប្រសាសន៍ថា វ៉ាក់សាំងការពារវីរុសកូវីដ១៩ដំបូងគេ អាចនឹងរួចរាល់នៅក្នុងរយៈពេល៥ខែទៀត ពោលគឺនៅក្នុងខែកញ្ញាខាងមុខ។
វ៉ាក់សាំងនេះនឹងត្រូវប្រើសម្រាប់ស្ថានភាពបន្ទាន់ ដូចជារលកថ្មីនៃការផ្ទុះវីរុសជាដើម ព្រោះមួយរយៈចុងក្រោយនេះប្រទេសចិនមានការចុះថយអ្នកឆ្លងជាលំដាប់។
ថ្លែងប្រាប់ទូរទស្សន៍ CGTN លោក Gao Fu បានបញ្ជាក់ថា ដើម្បីអភិវឌ្ឍវ៉ាក់សាំង ឬថ្នាំជាក់លាក់វាត្រូវការពេលវេលាសិក្សា ដើម្បីធានាថាមិនប៉ះពាល់ដល់អ្នកប្រើ។
យ៉ាងណា «វ៉ាក់សាំងបន្ទាន់» ដែលនឹងស្ថិតក្នុងដំណាក់កាលទី២ ឬទី៣ នៃការសាកល្បងព្យាបាល អាចត្រូវបានប្រើលើបុគ្គលិកពេទ្យមុនពេលឲ្យទៅប្រជាជនទូទៅ។
ដូច្នេះសម្រាប់មនុស្សធម្មតាដែលមិនឆ្លងវីរុស នឹងទទួលបានវ៉ាក់សាំងការពារនេះ នៅអំឡុងដើមឆ្នាំក្រោយ៕