ទីភ្នាក់ងារសារព័ត៌មាន Vietnamnews បានចេញផ្សាយនៅថ្ងៃទី៣០ មេសានេះថា តំបន់ទេសចរក្នុងខេត្ត Thanh Hoa ស្ថិតនៅភាគកណ្តាលនៃប្រទេស ពេលនេះ អាចទៅទស្សនាកម្សាន្តនៅតាមគោលដៅទេសចរនានា ក្នុងខេត្តបានវិញហើយ ដោយបានបើកទ្វារឡើងវិញ ចាប់តាំងពីចុងសប្តាហ៍។
យ៉ាងណាក៏ដោយ ក្រុមទេសចរមិនត្រូវបានអនុញ្ញាតឲ្យនៅជួបជុំគ្នា លើសពីចំនួន១០នាក់ទេ ហើយត្រូវតែគោរពតាមវិធានការទប់ស្កាត់ជំងឺរាតត្បាត និង ច្បាប់គម្លាតសង្គម។
ជាមួយគ្នាដែរ សាលារៀននៅទីក្រុងហូជីមីញ និងហាណូយត្រូវបានរំពឹងថា នឹងបើកដំណើរការថ្នាក់រៀនឡើងវិញ ចាប់ពីថ្ងៃទី៤ ឧសភា ២០២០។
គួរបញ្ជាក់ថា គិតត្រឹមថ្ងៃទី២៩ មេសា ករណីកូវីដ១៩នៅប្រទេសវៀតណាមមានចំនួន២៧០នាក់ដដែល ក្រោយរកមិនឃើញប៉ុន្មានថ្ងៃជាប់ៗគ្នា ហើយក្នុងចំណោមនេះ ក៏មានអ្នកជំងឺ២២២នាក់បានជាសះស្បើយ ត្រូវបានអនុញ្ញាតឲ្យចាកចេញពីមន្ទីរពេទ្យ។ មកទល់ពេលនេះ វៀតណាមពុំទាន់មានករណីស្លាប់ដោយសារតែជំងឺកូវីដ១៩នៅឡើយទេ៕