អន្តរជាតិ : បណ្ដាញផ្សព្វផ្សាយរុស្ស៊ី sputnik បានឲ្យដឹងនៅថ្ងៃទី១១ ខែឧសភា នេះថា ភ្លាមៗបន្ទាប់ពីសារព័ត៌មាន Bloomberg ផ្សាយថា លោកអនុប្រធានាធិបតីអាមេរិក Mike Pence ចាប់ផ្តើមនៅឆ្ងាយដាច់ដោយឡែកពីគេឯងនោះ, លេខាធិការព័ត៌មានរបស់គាត់គឺលោក Devin O’Malley បានប្រកាសច្រានចោលព័ត៌មាននេះភ្លាម ហើយបានថ្លែងថា លោកអនុប្រធានាធិបតី នឹងមានវត្តមាននៅសេតវិមានតាមការគ្រងទុកនៅថ្ងៃស្អែក ។
អ្នកនាំពាក្យរូបនេះថ្លែងកាលពីថ្ងៃទី១០ ខែឧសភាថា “លោកអនុប្រធានាធិបតី Pence នឹងបន្តអនុវត្តតាមការណែនាំរបស់អង្គភាពវេជ្ជសាស្ត្រ នៃសេតវិមាន និងមិនស្ថិតនៅដាច់ពីគេឯងនោះទេ ។ លើសពីនេះទៀត លោកអនុប្រធនាធិបតីបានធ្វើតេស្តិ៍អវិជ្ជមានរាល់ថ្ងៃ ហើយគ្រោងនឹងធ្វើការនៅឯសេតវិមាននៅថ្ងៃស្អែកនេះ” ។
ព័ត៌មានដ៍អកុសលនេះ បានកើតឡើងខណៈដែលកាលពីចុងសប្តាហ៍មុន ប្រធានាធិបតីអាមេរិក លោកដូណាល់ ត្រាំ បានថ្លែងថា លេខាធិការសារព័ត៌មានរបស់អនុប្រធានាធិបតី Mike Pence គឺលោកស្រី Katie Miller បានធ្វើតេស្តវិជ្ជមានវីរុសCOVID-19 ។
បើតាមទិន្នន័យចុងក្រោយបង្អស់ដែលប្រមូលបានដោយសាកលវិទ្យាល័យ Johns Hopkins បានបញ្ជាក់ថា សហរដ្ឋអាមេរិកបច្ចុប្បន្នមានករណីឆ្លងកូវីដ១៩ ចំនួន ១ ៣២៨ ២០១ នាក់ ក្នុងនោះបានស្លាប់ ៧៩ ៥០៨ នាក់ ៕hn