បើទោះបីជារាជរដ្ឋាភិបាលសម្រេចធ្វើការបន្ធូបន្ថយផ្នែកខ្លះ ក្រោយការធូរស្រាល នៃជំងឺកូវីដ១៩នៅកម្ពុជាក្តី ប៉ុន្តែសកម្មភាពប្រមូលផ្តុំកីឡាករហ្វឹកហ្វឺន, ការដំណើរការក្លឹបហាត់ប្រាណ និងការប្រកួតលីគ គឺនៅមិនទាន់អនុញ្ញាតឲ្យមានសកម្មភាពនៅឡើយទេ។
យោងតាមសេចក្តីជូនដំណឹងរបស់ក្រសួងអប់រំ កាលពីថ្ងៃម្សិលមិញបានបញ្ជាក់ថា សកម្មភាពទាំងអស់នោះ គឺត្រូវរង់ចាំសេចក្តីប្រកាសជាផ្លូវការរបស់រាជរដ្ឋាភិបាលស្តីពីការអនុញ្ញាតឲ្យដំណើរការការងារប្រក្រតីឡើងវិញសិន។
បើតាមក្រសួងអប់រំថា ទោះកម្ពុជាមានភាពល្អប្រសើរក្នុងរយៈពេលមួយខែកន្លងមក ពុំមានឆ្លងថ្មី ហើយអ្នកឆ្លងចំនួន ១២២នាក់បានជាសះស្បើយទាំងអស់ និងពុំមានអ្នកស្លាប់ ប៉ុន្តែតាមការវាយតម្លៃស្ថានភាពជំងឺកូវីដ១៩ នៅតែមានហានិភ័យខ្ពស់នៅឡើយ ដែលទាមទារឲ្យមានការប្រុងប្រយ័ត្នខ្ពស់បំផុត នឹងអាចមានរលកឆ្លងសារជាថ្មីនៅជុំទីពីរ៕
