(ភ្នំពេញ) – រដ្ឋមន្រ្តីក្រសួងសុខាភិបាលកម្ពុជាបានបញ្ជាក់ថា ដោយកន្លងមករាល់អ្នកជំងឺកូវីដ១៩នៅកម្ពុជា គឺសុទ្ធសឹងជាករណីនាំចូល ដូច្នេះកម្ពុជានឹងមិនបន្ធូរដៃឡើយ ដោយនៅតែបន្តរឹតបន្តឹងវិធានការការងារ និងបន្តយកចិត្តទុកដាក់ខ្ពស់ក្នុងសកម្មភាពបង្ការជំងឺកូវីដ១៩។
ក្នុងពេលចុះពិនិត្យការងារ និងសុខភាពអ្នកដំណើរពីបណ្តាប្រទេសផ្សេងៗត្រឡប់មកកម្ពុជា កាលពីអធ្រាត្រ ឈានចូលថ្ងៃទី២៥ ខែឧសភា លោក ម៉ម ប៊ុនហេង រដ្ឋមន្រ្តីក្រសួងសុខាភិបាលបានថ្លែងថា អ្នកដំណើរទាំងអស់ដែលទើបមកពីបរទេស នឹងមិនទាន់ឲ្យត្រឡប់ទៅផ្ទះនោះទេ គឺត្រូវយករថយន្ដដឹកពួកគាត់ ទៅដាក់មណ្ឌលត្រួតពិនិត្យសុខភាព ស្ថិតនៅក្នុងទីតាំងទ័ពអាកាសកងយោធពលខេមរភូមិន្ទ និងមណ្ឌលសុខភាពចាក់អង្រែក្រោម ដើម្បីយកសំណាកធ្វើតេស្ដរកកូវីដ១៩។
លោកបញ្ជាក់ថា រាល់អ្នកដំណើរទាំងអស់ត្រលប់មកកម្ពុជា គឺត្រូវតែធ្វើចត្តាឡីស័កចំនួន១៤ថ្ងៃ និងធ្វើតេស្តកូវីដ១៩ ដើម្បីចៀសផុតពីហានិភ័យខ្ពស់នៃការរីករាលដាលនៃជំងឺកូវីដ១៩ចូលមកកម្ពុជាយើង។ ទោះលទ្ធផល ចេញមកអវិជ្ជមានក៏ដោយ ក៏តម្រូវឲ្យអ្នកដំណើរនោះ បន្ដទៅធ្វើចត្ដាឡីស័កដោយខ្លួនឯងនៅផ្ទះចំនួន១៤ថ្ងៃទៀតបន្ថែមផងដែរ។
ជាមួយគ្នានេះ លោក ម៉ម ប៊ុនហេង ក៏បានបន្តអំពាវនាវដល់ប្រជាពលរដ្ឋ ត្រូវតែបន្តការពារ និងប្រុងប្រយ័ត្នខ្ពស់ ទៅតាមការវិធានការការពារ របស់ក្រសួងសុខាភិបាលឲ្យបានខ្ជាប់ខ្ជួន ទោះក្នុងកាលៈទេសៈណាក៏ដោយ៕
