លោក លី សំរិទ្ធ អភិបាលរងខេត្តសៀមរាប បានឲ្យដឹងថា អាកាសយាន្តដ្ឋានអន្តរជាតិខេត្តសៀមរាបថ្មី មានទីតាំងនៅទីប្រជុំជនផ្សារដំដែក ស្រុកសូនិគម ចម្ងាយ ៤០គីឡូម៉ែត្រ ពីក្រុងសៀមរាប ដែលដំណើរការសាងសង់បានរយៈពេល១ឆ្នាំរួចមកហើយ គ្រោងបញ្ចប់ការងារសាងសង់ និងដាក់ឲ្យដំណើរការផ្លូវការនៅឆ្នាំ២០២៣ខាងមុខ ជាមួយនឹងសមត្ថភាព អាចទទួល ភ្ញៀវបានប្រមាណជាង៩លាននាក់ ។
ថ្លែងក្នុងសន្និសីទសារព័ត៌មានស្ដីពី វឌ្ឍនភាព និងទិសដៅការងារបន្ដ របស់ខេត្ដសៀមរាប នៅព្រឹកថ្ងៃទី០២ ខែមិថុនា នាទីស្តីការគណៈរដ្ឋមន្រ្តី លោកបានបញ្ជាក់ថា អាកាសយានដ្ឋាននេះ នឹងជួយកាត់បន្ថយនូវភាពស្មុគស្មាញនៃការធ្វើដំណើររបស់ភ្ញៀវទេសចរអន្តរជាតិ ដែលហោះត្រង់ពីទ្វីបអឺរ៉ុប អាមេរិក និងបណ្តាប្រទេសផ្សេងៗទៀត ។
សូមបញ្ជាក់ថា សមត្ថភាពអាកាសយាន្តដ្ឋានអន្តរជាតិសៀមរាបបច្ចុប្បន្ននេះ គឺមិនមានសមត្ថភាពគ្រប់គ្រាន់ដើម្បីទទួលបានការហោះហើរត្រង់របស់យន្តហោះខ្នាតអន្តរជាតិនោះទេ ៕