រថយន្តទំនើបគ្មានពន្ធមួយគ្រឿងដែលពាក់ស្លាកលេខ «បាត់ដំបង វត្តម្លប់ពោធិព្រឹក្ស» ត្រូវបានមន្រ្តីមន្ទីរសាធារណការ និងដឹកជញ្ជូនខេត្តបាត់ដំបង និងមន្រ្តីនគរបាលយុត្តិធម៌ ចុះទៅធ្វើការដកហូតដល់វត្តដែលស្ថិតនៅស្រុកថ្មគោលតែម្តង ដោយលែងឲ្យប្រើប្រាស់ទៀតហើយ ព្រោះថានេះ គឺជាស្លាកលេខក្លែងក្លាយ។
ក្រោយពីធ្វើការដកហូត ក្រុមមន្រ្តីក៏បានតម្រូវឲ្យម្ចាស់រថយន្តនោះធ្វើកិច្ចសន្យាថែមទៀត។
ព្រះតេជគុណ ដាំ សុទិត្យ ព្រះចៅអធិការវត្តម្លប់ពោធិ៍ព្រឹក្ស បានសង្ឃដីកាថា រថយន្តគ្មានពន្ធមួយគ្រឿងនេះ ព្រះអង្គបានទិញកាលពីពាក់កណ្តាលខែមករា ឆ្នាំ២០១៩ ពីហាងមួយ ហើយក្រោយពីប្រើប្រាស់បានពីរខែ ព្រះអង្គក៏បានធ្វើស្លាកលេខវត្តនេះនៅហាងគ្រុឌមាស នៅសង្កាត់អូរចារ ក្រុងបាត់ដំបង ដើម្បីសម្គាល់ជារថយន្តរបស់វត្ត លុះដល់ថ្ងៃទី៧ ខែមិថុនា ឆ្នាំ២០២០ ក៏មានមន្រ្តីជំនាញចុះមកដល់វត្តរួចក៏ធ្វើការដកហូតស្លាកលេខមិនប្រក្រតី ចំណែករថយន្តបានរក្សាទុកនៅក្នុងវត្តដដែល។
ជាមួយគ្នានោះ សមត្ថកិច្ចក៏បានណែនាំមិនអនុញ្ញាតឲ្យរថយន្តខាងលើធ្វើចរាចរណ៍ដោយគ្មានស្លាកលេខសំគាល់ត្រឹមត្រូវតាមច្បាប់ដែលបានកំណត់ធ្វើចរាចរណ៍នៅលើផ្លូវសាធារណៈឡើយ៕