តាមរយៈបណ្តាញសង្គមកាលពីចុងសប្តាហ៍នេះ លោក វេង សាខុន រដ្ឋមន្រ្តីក្រសួងកសិកម្មរុក្ខាប្រមាញ់ និងនេសាទ បានលើកឡើងថា ការនាំចេញពោតក្រហមរបស់កម្ពុជាក្នុងរយៈពេល ៥ខែដើមឆ្នាំ២០២០នេះ សម្រេចបានត្រឹមតែ ៣៥ ៦៣៦ តោនប៉ុណ្ណោះ ដែលវា ថយចុះប្រមាណ ១៥ ០៤៣ តោន ឬស្មើនឹង -២៩,៦៨% ធៀបទៅនឹងរយៈ៥ខែដើមឆ្នាំ២០១៩។ លទ្ធផលនេះ លោករដ្ឋមន្រ្តីក្រសួងកសិកម្មបញ្ជាក់ថា វាជាការល្អ ព្រោះតែបរិមាណពោតក្រហមដែលសេសសល់ពីការនាំចេញយ៉ាងច្រើនសន្ធឹកសន្ធាប់នោះ បានដឹកចូលទៅរោងចក្រកែច្នៃចំណីសត្វក្នុងស្រុក ដែលវានឹងជួយជំរុញការកែច្នៃផលិតផលកសិកម្ម និងបង្កើនការចិញ្ចឹមសត្វក្នុងស្រុក ស្របតាមគោលនយោបាយរបស់ប្រមុខរាជរដ្ឋាភិបាល។
តាមការបង្ហាញរបស់លោក វេង សាខុន ថា ការផលិតពោតក្រហមរបស់កសិករកម្ពុជាមានការកើនឡើងជាលំដាប់ក្នុងរយៈពេលបួនឆ្នាំកន្លងទៅនេះ គឺសម្រេចបាន ១ ១១៤ ៩៥៦ តោន នៅឆ្នាំ២០១៩, សម្រេចបាន ១ ០៦៣ ៦៧៧ តោន នៅឆ្នាំ២០១៨, សម្រេចបាន ៥៩៦ ១១២ តោន នៅឆ្នាំ២០១៧ និង ៣៣៣ ០៥៨ តោន នៅឆ្នាំ២០១៦ ។
លទ្ធផលខាងលើនេះ លោករដ្ឋមន្រ្តីបញ្ជាក់ថា វាបង្ហាញនូវក្តីមោទនៈភាពជាតិ និងជាការពេញចិត្តសម្រាប់ប្រជាជន និងរាជរដ្ឋាភិបាល បើទោះបីបានឃើញតួលេខនាំចេញពោតក្រហមមានការថយចុះក្នុងរយៈពេលជាងមួយឆ្នាំនេះក្តី ព្រោះប្រាកដណាស់ថា បរិមាណពោតក្រហមដែលសល់ពីការនាំចេញយ៉ាងច្រើនសន្ធឹកសន្ធាប់ បានដឹកចូលទៅកាន់រោងចក្រកែឆ្នៃចំណីសត្វក្នុងស្រុក ស្របតាមគោលនយោបាយរបស់ប្រមុខរាជរដ្ឋាភិបាលកម្ពុជា ក្នុងការជំរុញការកែឆ្នៃផលិតផលកសិកម្ម និងបង្កើនការចិញ្ចឹមសត្វក្នុងស្រុក រួមទាំងការអនុវត្តគោលនយោបាយរបស់កម្ពុជាក្នុងការដំឡើងពន្ធនាំចូលពោតក្រហមពីខាងក្រៅមកកែឆ្នៃនៅកម្ពុជា៕
