ក្នុងសំណើសុំវិនិយោគដាក់ទៅកាន់គណៈកម្មការវិនិយោគកម្ពុជា ដែលត្រូវក្រុមប្រឹក្សាអភិវឌ្ឍន៍កម្ពុជាចេញផ្សាយនៅថ្ងៃនេះបានឲ្យដឹងថា មានក្រុមហ៊ុនមួយគ្រោងនឹងសង់សណ្ឋាគារថ្នាក់ផ្កាយ៤ ដែលមានចំនួន២០០បន្ទប់ នៅជាប់ស្ពានព្រះមុនីវង្ស។
សណ្ឋាគារនោះ វិនិយោគសាងសង់ដោយក្រុមហ៊ុន SUN & MOON HOTEL CO., LTD. ក្នុងទុនវិនិយោគប្រមាណ ៣៥,២លានដុល្លារអាមេរិក ដោយអាចបង្កើតការងារបានចំនួន ៥៣៥កន្លែង។
ក្រៅពីគម្រោងសណ្ឋាគារនោះ នៅថ្ងៃនេះដែរ ក្រុមប្រឹក្សាអភិវឌ្ឍន៍កម្ពុជា ក៏បានអនុញ្ញាតឲ្យក្រុមហ៊ុនចំនួន៣ទៀត ធ្វើការវិនិយោគនៅកម្ពុជា រួមមាន៖
១-“HUA TE BANG (CAMBODIA) CO., LTD.” គម្រោងបង្កើតរោងចក្រផលិតផលិតផលពីប្លាស្ទីកគ្រប់ប្រភេទ ដែលមានទីតាំងវិនិយោគស្ថិតនៅភូមិត្រពាំងត្រប់ សង្កាត់បឹងធំ ខណ្ឌកំបូល រាជធានីភ្នំពេញ មានទុនវិនិយោគប្រមាណ ២,៨លានដុល្លារអាមេរិក និងអាចបង្កើតការងារបានចំនួន ២១៦កន្លែង។
២- “PRINTX GP (CAMBODIA) FACTORY CO., LTD.” គម្រោងបង្កើតរោងចក្រផលិតកាបូបគ្រប់ប្រភេទ និងគ្រឿងបន្សំកាបូប ដែលមានទីតាំងវិនិយោគស្ថិតនៅផ្លូវជាតិលេខ៥១ ភូមិត្រពាំងផ្លុង ឃុំដំណាក់រាំង ស្រុកឧដុង្គ ខេត្តកំពង់ស្ពឺ មានទុនវិនិយោគប្រមាណ ៦,៦លានដុល្លារអាមេរិក និងអាចបង្កើតការងារបានចំនួន ១.៤១៤កន្លែង។
៣-“DIZE (CAMBODIA) NONG YE FAZHAN CO., LTD.” គម្រោងបង្កើតកសិដ្ឋានដាំដំណាំចេក ដែលមានទីតាំងវិនិយោគស្ថិតនៅភូមិមាឃ ឃុំព្រែកកក់ ស្រុកស្ទឹងត្រង់ ខេត្តកំពង់ចាម មានទុនវិនិយោគប្រមាណ ១៧,៨លានដុល្លារអាមេរិក និងអាចបង្កើតការងារបានចំនួន ១.៩០០កន្លែង៕