តំបន់ទេសចរណ៍ស្ទឹងពពក ជាតំបន់ទេសចរណ៍ថ្មីត្រូវរកឃើញកាលពីឆ្នាំ២០១៩ ស្ថិតនៅភូមិព្រះអង្គកែវ ឃុំដងពែង ស្រុកស្រែអំបិល ខេត្តកោះកុង។ តំបន់ទេសចរណ៍ថ្មីនេះបានទាក់ទាញភ្ញៀវទេសចរគ្រប់រដូវកាល ដោយសារតែវាមានសម្រស់ធម្មជាតិ និងបាតុភូតពពកដ៏សក្បុសគួរឲ្យចង់ទស្សនា។
តាមការបញ្ជាក់របស់លោកជំទាវ មិថុនា ភូថង អភិបាលខេត្តកោះកុងថា តំបន់ទេសចរណ៍ស្ទឹងពពកនេះ មានលក្ខណៈពិសេសជាច្រើនដូចជា ពេលល្ងាចភ្ញៀវទេសចរអាចគយគន់ព្រះអាទិត្យលិចតាមជ្រលងភ្នំដ៏ស្រស់ត្រកាល ពេលព្រឹកមានអ័ព្ទពពកយ៉ាងសក្បុសត្រជាក់ភ្នែកមើលមិនចេះជិនណាយឡើយ ដោយធ្វើឲ្យភ្ញៀវទេសចរទទួលបានអារម្មណ៍រីករាយស្រស់ស្រាយបាត់ទុក្ខកង្វល់ ព្រោះបានទស្សនាបរិយាកាសបែបធម្មជាតិបរិសុទ្ធ។
