សន្លឹកឆ្នោតសរុបចំនួន ៤៣.២៥៣កញ្ចប់ ត្រូវជា ២២.០០១.០៥០សន្លឹក ដែលជាសន្លឹកឆ្នោតប្រើប្រាស់ក្នុងការបោះឆ្នោត ឆ្នាំ២០១២ ឆ្នាំ២០១៣ ឆ្នាំ២០១៤ និងឆ្នាំ២០១៧ ត្រូវ គ.ជ.ប ធ្វើការបំផ្លាញចោលនៅព្រឹកថ្ងៃទី២៤ ខែមិថុនា ឆ្នាំ២០២០នេះ។
លោក ទេព នីថា អគ្គលេខាធិការគណៈកម្មាធិការជាតិរៀបចំការបោះឆ្នោត (គ.ជ.ប) បានថ្លែងថា ការបំផ្លាញសន្លឹកឆ្នោតនេះ គឺធ្វើឡើងមានរយៈពេលពេញមួយសប្តាហ៍ ដោយ គ.ជ.ប នឹងចាត់តាំងមន្រ្តីឲ្យតាមដាន ត្រួតពិនិត្យជាប្រចាំ ហើយក្នុងរយៈពេលនេះតំណាងគណបក្សនយោបាយពាក់ព័ន្ធអ្នកសង្កេតការណ៍ និងអ្នកយកព័ត៌មានក៏អាចចូលរួមតាមដាន និងសង្កេតមើលបាន។
លោក ទេព នីថា អគ្គលេខាធិការគណៈកម្មាធិការជាតិរៀបចំការបោះឆ្នោត (គ.ជ.ប)
បើតាមរបាយការណ៍ សន្លឹកឆ្នោតទាំងជាង ២២លានសន្លឹកនេះ រួមមាន៖
* សន្លឹកឆ្នោត ដែលបានប្រើប្រាស់ហើយក្នុងការបោះឆ្នោតជ្រើសតាំងតំណាងរាស្ត្រ នីតិកាលទី៥ ឆ្នាំ២០១៣ មានចំនួន ២០.៦៤២ កញ្ចប់ ត្រូវជា១២.៣២៥.៦៥០សន្លឹក
* សន្លឹកឆ្នោត ដែលបានប្រើប្រាស់ហើយ ក្នុងការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៤ ឆ្នាំ២០១៧ មានចំនួន ២២.១៤៨ កញ្ចប់ ត្រូវជា៩.៥៩១.២០០សន្លឹក រួមនឹង សន្លឹកឆ្នោត ដែលបានប្រើប្រាស់ហើយ ក្នុងការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៣ ឆ្នាំ២០១២ មានចំនួន៥៩កញ្ចប់ ត្រូវជា ២៥.០០០ សន្លឹក។
* សន្លឹកឆ្នោត ដែលបានប្រើប្រាស់ហើយក្នុងការបោះឆ្នោតជ្រើសរើសក្រុមប្រឹក្សារាជធានី-ខេត្ត ក្រុមប្រឹក្សាក្រុងស្រុកខណ្ឌ អាណត្តិទី២ ឆ្នាំ២០១៤ មានចំនួន៤៤៤ កញ្ចប់ ត្រូវជា ៥៩.២០០ សន្លឹក។
