ភ្នំពេញ៖ នៅព្រឹកថ្ងៃទី៧ ខែកក្កដា ឆ្នាំ២០២០នេះ តំណាងអយ្យការអមសាលាដំបូងរាជធានីភ្នំពេញ បានសម្រេចធ្វើការចោទប្រកាន់អភិបាលរងខេត្តបាត់ដំបង ព្រមជាមួយនឹងលោកឧកញ៉ា សង ថន ពាក់ព័ន្ធទៅនឹងរឿងពុករលួយដីធ្លីនៅស្រុកគាស់ក្រឡ។
បើតាមអ្នកនាំពាក្យថា លោក ស៊ូ អារ៉ាហ្វាត់ ដែលមានតួនាទីជាអភិបាលរងខេត្តបាត់ដំបង ត្រូវបានចោទប្រកាន់ពីបទបំផ្លាញដោយចេតនា, បទគៃបំបាត់ដោយទុច្ចរិត និងបទស៊ីសំណូក។ ចំណែកលោកឧកញ៉ា សង ថន ដែលមានដី១ភាគ៤ នៃស្រុកគាស់ក្រឡ ត្រូវបានចោទពីបទផ្តើមគំនិតគិត ក្នុងបទបំផ្លាញដោយចេតនា និងគៃបំបាត់ដោយទុច្ចរិត។
ក្រោយពីតំណាងអយ្យការធ្វើការចោទប្រកាន់ ពេលនេះ សំណុំរឿងដីធ្លីនៅស្រុកគាស់ក្រឡដ៏រស៊ើបមួយនេះ ត្រូវបានបញ្ជូនទៅចៅក្រមស៊ើបសួរហើយ។
គួរបញ្ជាក់ថា លោក ស៊ូ អារ៉ាហ្វាត់ អភិបាលរងខេត្តបាត់ដំបង និងឧកញ៉ា សង ថន ត្រូវបានសមត្ថកិច្ច នៃអង្គភាពប្រឆាំងអំពើពុករលួយ ធ្វើការឃាត់ខ្លួនកាលពីដើមខែនេះ ពាក់ព័ន្ធនឹងរឿងដីធ្លីរាប់ពាន់ហិកតានៅស្រុកគាស់ក្រឡ ខណៈចៅហ្វាយស្រុកនេះ ក៏ត្រូវបានដកតំណែងយកទៅបញ្ឈរជើងនៅសាលាខេត្តផងដែរ៕