តាកែវ៖ ប្រធានមន្ទីរកសិកម្ម រុក្ខាប្រមាញ់និងនេសាទខេត្តតាកែវ បានឲ្យដឹងថា បច្ចុប្បន្ននេះ ខេត្តតាកែវមានកសិដ្ឋានចិញ្ចឹមមាន់ខ្មៅចំនួន៥កន្លែង ក្រោមការផ្តល់បច្ចេកទេសពីមន្ទីរកសិកម្មខេត្តលើកម្មវិធីផ្សព្វផ្សាយពីបច្ចេកទេសកសិកម្មថ្មី ដែលធន់នឹងការប្រែប្រួលអាកាសធាតុ។
លោកថា ក្រោយពេលទទួលបានបច្ចេកទេសនៃការចិញ្ចឹម បានធ្វើឲ្យមាន់ខ្មៅនេះ ទទួលបានលទ្ធផលល្អ ដោយក្នុងមួយក្បាលទម្ងន់ប្រមាណ២គីឡូក្រាម ហើយកសិករអាចលក់បានជាង១០ម៉ឺនរៀល បើប្រៀបធៀបទៅនឹងមាន់ខ្មែរ ឬមាន់ផ្សេងៗទៀតគឺមាន់ខ្មៅមានតម្លៃខ្ពស់ហើយមានទីផ្សារល្អ ។ ដោយឡែកសម្រាប់មាន់ខ្មៅពូជវិញ គឺមួយក្បាលតម្លៃចាប់ពី១២ម៉ឺនរៀលឡើងទៅ ។
លោក ស៊ី សម្ភស្ស កសិករចិញ្ចឹមមាន់ខ្មៅនៅខេត្តតាកែវ បានឲ្យដឹងថា គាត់បានផ្លាស់ប្តូរពីការចិញ្ចឹមមាន់ខ្មែរធម្មតាមកជាការចិញ្ចឹមមាន់ខ្មៅវិញ ដោយសារមានលក្ខណៈងាយស្រួលចិញ្ចឹមដូចមាន់ស្រែធម្មតា ជាពិសេសទទួលបានតម្លៃខ្ពស់ជាង ។ «ពីមុនខ្ញុំដាក់មាន់ខ្មែរខ្ញុំធ្វើរោងធំដែល ប៉ុន្តែដល់ពេលយើងចិញ្ចឹមមាន់ខ្មែរគឺចិញ្ចឹមរាងយូរដូចមាន់ខ្មៅដែល ដោយសារភ្ញៀវសាញរឿងដុះរោមមិនទាន់ជិត ដល់ពេលចឹងទៅយើងក៏ដូរមកចិញ្ចឹមមាន់ខ្មៅវិញ វាស្រួលចិញ្ចឹមយើងដុះរោមលឿនជាង ។ សំរាប់តម្លៃគឺថ្លៃជាង។ ៥ទៅ៦ខែគឺពេញវ័ញហើយ »។
សូមបញ្ជាក់ថា មាន់ខ្មៅអាចយកទៅកែច្នៃជាម្ហូបបានយ៉ាងច្រើនប្រភេទ ដូចជា មាន់ស្ងោ មាន់ចៀន សាច់ក្រក ប្រហិត សាច់ផាត់ ហើយការបរិភោគគឺជួយឲ្យមានសុខភាពល្អ រាងកាយមាំមួន៕
ប្រភព៖ ក្រសួងព័ត៌មាន
