ក្រុមហ៊ុន MIZUDA ជាក្រុមហ៊ុនវិនិយោគកែច្នៃ សំរាមទៅជាឋាមពលអគ្គីសនីរបស់ប្រទេសចិន កាលពីថ្ងៃទី២១ ខែកក្កដា ឆ្នាំ២០២០កន្លងទៅនេះ បានបង្ហាញរបាយការណ៍របស់ខ្លួន ស្តីពីគម្រោងសាងសង់រោងចក្រដុតសំរាម ដើម្បីផលិតទៅជាឋាមពល អគ្គិសនីសម្រាប់ប្រើប្រាស់នៅខេត្តសៀមរាប។
នៅក្នុងរបាយការណ៍នេះបានបង្ហាញថា សំរាមនៅក្នុងក្រុងសៀមរាបបច្ចុប្បន្ន នេះមានប្រមាណជាង៤៨០តោន ក្នុង១ថ្ងៃ ហើយនៅឆ្នាំ២០២២ អាចនឹងកើនដល់៦០០តោន ក្នុង១ថ្ងៃ បើគិតរហូតដល់ឆ្នាំ២០៣៥ ការប៉ាន់ប្រមាណដែលផ្អែកទៅលើកំណើនប្រជាពលរដ្ឋ និងកំណើនភ្ញៀវទេសចរផងនោះ ក្នុង១ថ្ងៃ សំរាមក្នុងក្រុងសៀមរាប អាចមានដល់ ជាង១០០០តោន។ របាយការណ៍នេះ ក្រុមហ៊ុនបានសិក្សាអស់រយៈពេលជាងកន្លះឆ្នាំ និងបានបញ្ចប់កាលពីមុនខែធ្នូឆ្នាំ២០១៩កន្លងទៅ។
បើតាមការបង្ហាញ របស់ក្រុមហ៊ុន MIZUDA របស់ចិន ក្នុង១ឆ្នាំ រោងចក្រនេះ មានតម្រូវការសំរាមប្រមាណជា២១ម៉ឺនតោន និងអាចបំលែង ជាឋាមពលអគ្គិសនី ផ្គត់ផ្គង់ បានប្រមាណជា៧៥ម៉ឺនគីឡូវ៉ាត់ម៉ោង ក្នុងកម្លាំង អានុភាព១២មេកាវ៉ាត់ គឺស្មើនឹង ប្រហែល១០ភាគរយ នៃតម្រូវការផ្គត់ផ្គង់ក្នុង ក្រុងសៀមរាប បច្ចុប្បន្ន។ នៅក្នុងបទបង្ហាញនេះ ក៏មានការទទួលស្គាល់អំពីបច្ចេកទេស និងការផ្តល់ អត្ថប្រយោជន៍នៃប្រតិបត្តិការ របស់រោងចក្រដុតសំរាមមួយនេះ ដែលវាមានគុណភាព មិនបន្សល់ផលប៉ះពាល់បរិស្ថាន ក្រោយការផលិតឋាមពលអគ្គិសនីនោះ។
យ៉ាងណាក៏ដោយ លោក ទៀ សីហា អភិបាលខេត្តសៀមរាប បានបង្ហាញនូវជំហរគាំទ្រចំពោះគម្រោងវិនិយោគនេះ បើទោះជាសមត្ថភាព នៃការផលិតឋាមពលអគ្គីសនីបានត្រឹមតែ១០ភាគរយនៃតម្រូវការយ៉ាងណាក៏ដោយ ក៏ប៉ុន្តែវាមានប្រសិទ្ធភាព ក្នុងកិច្ចការពារបរិស្ថាន។
ចំពោះបញ្ហាប្រមូលសំរាម ការកំណត់តម្លៃលក់ឋាមពល ការកំណត់ទីតាំងសាងសង់រោងចក្រ នឹងត្រូវសិក្សាស៊ីជម្រៅបន្ថែមទៀត សម្រាប់ការ បង្ហាញក្នុងកិច្ចប្រជុំលើកក្រោយ ស្តីពីវឌ្ឍនភាពនៃគំរោងនេះ ដើម្បីជំរុញល្បឿន នៃកិច្ចដំណើរការ តាមតែលទ្ធភាពដែលអាចធ្វើទៅបាន៕
