វៀតណាម៖ ប្រទេសវៀតណាមនៅថ្ងៃសុក្រនេះ បានរកឃើញមនុស្ស៤៥នាក់បន្ថែមទៀត នៅទីក្រុងដាណាង កើតជំងឺកូវីដ១៩។ តួលេខនេះ បានក្លាយជាតួលេខមានអ្នកឆ្លងជំងឺកូវីដ១៩ប្រចាំថ្ងៃខ្ពស់បំផុត នៅក្នុងពេលត្រឹមតែមួយថ្ងៃ។
អ្នកជំងឺថ្មីមានអាយុនៅរវាង២៧ឆ្នាំ និង៨៧ឆ្នាំ ស្ថិតនៅក្នុងទីក្រុងដាណាងជាតំបន់ទេសចរណ៍មួយដែលអាជ្ញាធរវៀតណាមបានប្រកាសពីការឆ្លងក្នុងសហគមន៍ជាលើកដំបូងកាលពីសប្តាហ៍មុន មិនធ្លាប់មានក្នុងរយៈពេល៣ខែកន្លងមកនេះ។
នៅឯទីក្រុងហាណូយឯណោះវិញ ដើម្បីទប់ស្កាត់ការឆ្លងរាលដាលជំងឺកូវីដ១៩ កាលពីថ្ងៃព្រហស្បតិ៍ អាជ្ញាធរនៃប្រទេសវៀតណាម បានចាប់ផ្តើមការធ្វើតេស្តរកជំងឺកូវីដ១៩ទ្រង់ទ្រាយធំ។ ជាមួយគ្នាក៏មានការហាមឃាត់ការប្រមូលផ្តុំនៅតំបន់សេដ្ឋកិច្ច និងជម្រុញអោយអ្នកដំណើរក្នុងស្រុករាប់ពាន់នាក់រាយការណ៍ទៅអាជ្ញាធរ។
ក្រសួងសុខាភិបាលវៀតណាម បានបញ្ជូនអ្នកជំនាញសុខាភិបាលក្រុមពិសេស រួមនិងបុគ្គលិកសុខាភិបាលច្រើនជាង១០០០នាក់ ទៅកាន់ទីក្រុងដាណាងដើម្បីជួយដោះស្រាយបញ្ហាប្រឈមដែលកំពុងតែកើតមាននៅទីក្រុងមួយនេះ។
ករណីឆ្លងជំងឺកូវីដ១៩នាពេលថ្មីៗនៅទីក្រុងដាណាង បានធ្វើអោយចំនួនអ្នកជំងឺកូវីដ១៩សរុបនៅក្នុងប្រទេសវៀតណាមរហូតមកដល់ពេលនេះ បានកើនឡើងដល់៥០៩នាក់ ប៉ុន្តែគ្មានអ្នកស្លាប់បាត់បង់ជីវិតឡើយ៕
