មណ្ឌលគិរី៖ បើយោងតាមសេចក្តីរាយការណ៍បានឲ្យដឹងថា បន្ទប់សណ្ឋាគារ ផ្ទះសំណាក់ប្រមាណជាង១ពាន់បន្ទប់នៅខេត្តមណ្ឌលគិរី ត្រូវពេញអស់ ដោយសារតែភ្ញៀវទេសចរសម្រុកទៅលេងខេត្តមណ្ឌលគិរីច្រើន ធ្វើឲ្យភ្ញៀវទេសចរមួយចំនួនធំដែលមិនបានកក់បន្ទប់សណ្ឋាគារ ផ្ទះសំណាក់ ត្រូវសម្រាកនៅតាមផ្ទះអ្នកស្រុក ឬបោះតង់ និងមានខ្លះទៀតត្រូវសុំព្រះសង្ឃដើម្បីសម្រាកនៅក្នុងបរិវេណវត្ត។
តាមសេចក្តីរាយការណ៍ដដែល កាលពីថ្ងៃម្សិលមិញនេះ នៅតាមរមណីយដ្ឋានសំខាន់ៗដូចជា សមុទ្រឈើ ភ្នំដោះក្រមុំ ភ្នំអណ្តូងស្នេហ៍ ទឹកជ្រោះប៊ូស្រា ចំការស្រល់ និងកន្លែងដទៃផ្សេងៗទៀត គឺពេញណែនស្ទើររកផ្លូវដើរមិនបាន ។ ចំណែកអាហារដ្ឋាននានាមិនអាចបម្រើសេវាកម្មដល់ភ្ញៀវបានគ្រប់គ្រាន់ឡើយ តែភ្ញៀវទេសចរខ្លះពួកគាត់បានរៀបចំទិញម្ហូបអាហារចំអិនដោយខ្លួនឯង ដើម្បីបរិភោគ។
ចំណែកអាកាសធាតុហាក់មានភាពអំណោយផល នៅពេលថ្ងៃផ្ទៃមេឃស្រឡះល្អ មានខ្យល់ជំនោរត្រជាក់ អាចឲ្យអ្នកទេចរណ៍ដើរលេងកម្សាន្តយ៉ាងសប្បាយ តែនៅពេលល្ងាច និងយប់ មានភ្ញៀវធ្លាក់ និងសីតុណ្ហភាពចុះត្រឹម១៩ ទៅ២១អង្សាប៉ុនណោះ៕
