ភ្នំពេញ៖មន្ត្រីនាំពាក្យក្រសួងសុខាភិបាលលោកស្រី ឱ វណ្ណឌីន នាថ្ងៃទី១៨សីហានេះ បានចេញមកជម្រះការសង្ស័យនានាពាក់ព័ន្ធការចុះផ្សាយរបស់កាសែតបរទេសរឿងជនជាតិចិន៦នាក់ដែលពុំមានឈ្មោះនៅក្នុងបញ្ជីរាយការណ៍ពីលទ្ធផលនៃការធ្វើតេស្តរកមេរោគកូវីដ-១៩ ។
អ្នកនាំពាក្យរូបនេះបានថ្លែងប្រាប់បណ្ដាញផ្សព្វផ្សាយព័ត៌មានថា ក្រសួងតែងតែចេញផ្សាយព័ត៌មានស្តីពីការរកឃើញអ្នកវិជ្ជមានវីរុសកូវីដ-១៩ ថ្មី អ្នកព្យាបាលជាសះស្បើយ និងអ្នកកំពុងនៅសម្រាកព្យាលបាលក្នុងមន្ទីរពេទ្យរដ្ឋ និងឯកជន ប្រកបដោយតម្លាភាព ដោយមិនមាន ការលាក់លៀមអ្វីទាំងអស់ ហើយក៏មិនមានការបាត់ករណីអ្នកវិជ្ជមានវីរុសកូវីដ-១៩ ថ្មី នៅក្នុងប្រទេសកម្ពុជានោះទេ។
សេចក្ដីថ្លែងនេះបានធ្វើឡើងបន្ទាប់ពីកាសែត The Cambodia Daily កាលពីថ្ងៃទី១៧សីហា បានចុះផ្សាយអត្ថបទដែលមានចំណងជើងថា «Mystery in Cambodia over missing Covid-positive Chinese » និងការចុះផ្សាយរបស់សារព័ត៌មាន UCA News ដែលមានចំណងជើថា «Mystery in Cambodia over missing Covid-positive Chinese » ដែលមានន័យថា អាថ៍កំបាំង នៃការបាត់ខ្លួនជនជាតិចិនដែលមានវិជ្ជមានមេរោគកូវីដ-១៩ ។
យ៉ាងណាក៍ដោយលោកស្រី ឱ វណ្ណឌីន បានបញ្ជាក់ថា ករណីជនជាតិចិនទាំង ៦នាក់ ដែលបានលើកឡើងនោះ គឺមិនមានភាពអាថ៌កំបាំងអ្វីនោះឡើយ ដោយពួកគាត់ទាំង ៦នាក់នេះ មានលទ្ធផលតេស្តអវិជ្ជមានវីរុសកូវីដ-១៩ ដែលមិនមានភាពចាំបាច់ដែលត្រូវរាយការណ៍ជាសាធារណ: ដូចដែលក្រសួង មិនដែលបានរាយការណ៍នូវរាល់បុគ្គលដែលមានលទ្ធផលអវិជ្ជមានវីរុសកូវីដ-១៩ តាំងពីចាប់ផ្តើមមានការរកឃើញអ្នកជំងឺកូវីដ-១៩ នៅក្នុងប្រទេសកម្ពុជាមកម្ល៉េះ លើកលែងតែអ្នកដែលត្រូវបានពិនិត្យព្យាបាលជាសះស្បើយតែប៉ុណ្ណោះ ៕