ភ្នំពេញ៖ ផ្ទះប្រជាពលរដ្ឋដែលជាកន្លែងវេលុយចំនួន៤កន្លែង និងកន្លែងលក់ស្រាក្រឡុកមួយកន្លែងទៀត ស្ថិតនៅតាមបណ្តោយផ្លូវវេងស្រេង ក្នុងសង្កាត់ចោមចៅទី២ ខណ្ឌពោធិ៍សែនជ័យ ត្រូវបានរថយន្តកុងតឺន័រមួយគ្រឿងក្រឡាប់បុក ក្រោយពីរថយន្តនោះបើកក្នុងល្បឿនលឿននៅត្រង់ចំណុចផ្លូវកោង កាលពីវេលាម៉ោងប្រមាណ ២រំលងអធ្រាត្រឈាមចូលថ្ងៃទី១៥ ខែកក្កដា ឆ្នាំ២០២០នេះ។
រថយន្តបង្កពាក់ស្លាកលេខ ភ្នំពេញ 3C-6327 ចំណែកអ្នកបើកបរមិនត្រូវបានស្គាល់អត្តសញ្ញាណនោះទេ។
ប្រភពពីកន្លែងកើតហេតុបានឲ្យដឹងថា ដំបូងឡើយគេឃើញរថយន្តកុងតឺន័របើកតាមបណ្ដោយផ្លូវវេងស្រេងទិសដៅពីលិចមកកើតយ៉ាងលឿន ខណៈមកដល់ចំណុចកើតហេតុខាងលើដោយសារតែផ្លូវកោងបួងចង្កូតមិនទាន់បណ្ដាលឲ្យទៅបុកគម្របលូបែកទុយោទឹករបស់រដ្ឋចេញទឹកអស់មួយនឹងបន្តទៅបុករះផ្ទះប្រជាពលរដ្ឋវេរលុយផ្ទះវីង ផ្ទះអ៊ីម៉ាន់នី ផ្ទះលីហួរ ផ្ទះទ្រូម៉ាន់នីហើយបន្តទៅមុខនឹងក្រឡាប់លើកន្លែងលក់ស្រាក្រឡុកបែកបាក់ទូរតុកៅអីអស់ជាច្រើនទៀត។
ភ្លាមៗគេឃើញតៃកុងរថយន្តបានបើកទ្វារចេញ រត់បាត់ស្រមោល តែសំណាងល្អ ក្នុងហេតុការណ៍គ្រោះថ្នាក់ចរាចរណ៍នេះពុំមាននរណាម្នាក់រងរបួស ឬក៏ស្លាប់នោះទេ៕