តាកែវ – ទីបំផុតទៅ នៅថ្ងៃទី១១ ខែធ្នូ ឆ្នាំ២០២០ លោក ឌឹម គឹមសាន អភិបាលស្រុកអង្គរបូរី រួមជាមួយមន្រ្តីពាក់ព័ន្ធ បានចុះទៅកាន់ភូមិរំលក ឃុំបាស្រែ, ទីដែលមានបណ្តឹងពីប្រជាពលរដ្ឋថា មានកសិដ្ឋានចិញ្ចឹមទាមួយ បានមកបោះទីតាំងនៅកណ្តាលភូមិ បង្ករឲ្យមានក្លិនឈួល ប៉ះពាល់ដល់ការរស់នៅរបស់ប្រជាពលរដ្ឋ។
អាជ្ញាធរចុះពិនិត្យកសិដ្ឋានចិញ្ចឹមទា
ក្នុងការចុះពិនិត្យជាក់ស្តែងនោះ លោកអភិបាលស្រុកអង្គរបូរី រួមជាមួយមន្រ្តីបរិស្ថាន បានបដិសេធមិនឲ្យមានការចិញ្ចឹមទានៅក្នុងភូមិយ៉ាងដូចនេះទេ ហើយក៏បានអញ្ជើញម្ចាស់កសិដ្ឋាន ដែលមានប្តីឈ្មោះ ប៉ុល សំអាត និងប្រពន្ធឈ្មោះ សឹក គឹមឡេង ទៅសាលាស្រុកអង្គរបូរី ដើម្បីបំពេញបែបបទ និងធ្វើកិច្ចសន្យាចំពោះផលប៉ះពាល់ពលរដ្ឋ និងបរិស្ថាន។
គួររំលឹកថា កសិដ្ឋានចិញ្ចឹមទាដែលឈ្មួញរៀបចំធ្វើនៅកណ្តាលភូមិរំលកនេះ ត្រូវបានជំទាស់តវ៉ាពីប្រជាពលរដ្ឋតាំងតែពីខែតុលាមកម្ល៉េះ កំឡុងពេលឈ្មួញទាំងពីរនាក់ប្តីប្រពន្ធនេះកំពុងរៀបចំធ្វើកសិដ្ឋានដំបូង ដែលពេលនោះគេឃើញមានទាំងមន្រ្តីបរិស្ថាន ក៏ដូចជាអាជ្ញាធរឃុំបានចុះទៅហាមឃាត់ ដោយមិនអនុញ្ញាតឲ្យមានទីតាំងចិញ្ចឹមទានៅកណ្តាលភូមិនោះឡើយ។
កសិដ្ឋានចិញ្ចឹមទាដែលប៉ះពាល់បរិស្ថាន
តែក្រោយមក ពោលគឺកាលពីពេលថ្មីៗនេះ ស្រាប់តែឈ្មួញពីរនាក់ប្តីប្រពន្ធនោះ ដឹកសត្វទាចំនួន ២ពាន់ក្បាល យកមកដាក់នៅកសិដ្ឋានរបស់ខ្លួនយ៉ាងរំភើយ ដោយធ្វើឲ្យប្រជាពលរដ្ឋនៅក្នុងភូមិរំលក មានការងឿងឆ្ងល់យ៉ាងខ្លាំងថា តើឈ្មួញនេះ កំពុងផ្គើនអាជ្ញាធរ ឬក៏ត្រូវរ៉ូវជាមួយអាជ្ញាធរ ទើបបានជាហ៊ានដឹកសត្វទាដល់ទៅ២ពាន់ក្បាល មកដាក់ចិញ្ចឹមនៅកណ្តាលភូមិ ដោយមិនខ្វល់ពីការប៉ះពាល់ដល់ប្រជាពលរដ្ឋរស់នៅក្នុងភូមិយ៉ាងដូច្នេះ?
យ៉ាងណាក៏ដោយ ប្រជាពលរដ្ឋរំពឹងថា អាជ្ញាធរនឹងដោះស្រាយបញ្ហានេះដោយតម្លាភាព និងគិតគូរដល់ការរស់នៅរបស់បងប្អូនប្រជាពលរដ្ឋ ជាជាងផលប្រយោជន៍របស់បុគ្គល៕
