តាកែវ – សំណុំរឿងចោទប្រកាន់មន្រ្តីជលផល ដែលដឹកនាំដោយលោក គឹម សារិទ្ធ នាយរងអធិការកិច្ចចតុមុខ ថាបានវាយដំពលរដ្ឋម្នាក់បណ្តាលឲ្យរងរបួសធ្ងន់ ហើយសមត្ថកិច្ចប៉ូលិសមិនអាចបើកការស៊ើបអង្កេតបាននោះ ពេលនេះកំពុងតែស្ថិតនៅក្នុងដៃមន្ទីរកសិកម្ម រុក្ខាប្រមាញ់ និងនេសាទខេត្តតាកែវ ដែលកំពុងរៀបចំរបាយការណ៍បញ្ជូនទៅកាន់ថ្នាក់លើ ខណៈដែលសំណុំរឿងនេះមានការលើកឡើងនូវហេតុផលពីរផ្សេងគ្នា។
ហេតុផលពីរផ្សេងគ្នានោះ គឺខាងក្រុមគ្រួសារជនរងគ្រោះ បានចោទប្រកាន់លោក គឹម សារិទ្ធ នាយរងអធិការកិច្ច ថាបានវាយដំជនរងគ្រោះដោយស្នូកកាំភ្លើង ក្នុងពេលចុះប្រតិបត្តិការបង្រ្កាបបទល្មើសនេសាទ រហូតដល់ជនរងគ្រោះរងរបួសធ្ងន់បាត់មាត់បាត់ក ទើបភ័យក៏បញ្ជូនជនរងគ្រោះទៅកាន់មន្ទីរពេទ្យ, ហើយកម្លាំងជលផលដែលចុះប្រតិបត្តិការនៅពេលនោះ គឺមានតែ២នាក់ទៀត ដោយមនុស្ស៨នាក់ផ្សេងទៀតមិនមែនជាកម្លាំងជលផល តែជាមនុស្សដែលលោក គឹម សារិទ្ធ ជួលមកឲ្យធ្វើសកម្មភាពបង្រ្កាប។
តែបើតាមការលើកឡើងរបស់លោក គឹម សារិទ្ធ វិញ ករណីនេះ គឺជាករណីគ្រោះថ្នាក់ចរាចរណ៍ ដោយទូកបុកគ្នា មិនមានការប្រើហិង្សាអ្វីនោះទេ។
យ៉ាងណាបើតាមលោក សៅ កុសល នាយខណ្ឌរដ្ឋបាលជលផលខេត្តតាកែវថា ករណីនេះគឺខាងមន្ទីរកសិកម្មកំពុងធ្វើរបាយការណ៍, របាយការណ៍ដែលបានមកពីខាងមន្រ្តីជលផល ក៏ដូចជាការសាកសួរប្រភពផ្សេងៗ ព្រោះថា បច្ចុប្បន្នជនរងគ្រោះកំពុងស្ថិតនៅក្នុងមន្ទីរពេទ្យនៅឡើយ ដោយពុំអាចផ្តល់ចម្លើយបាន។
ពាក់ព័ន្ធនឹងលោក គឹម សារិទ្ធ ប្រើប្រាស់មនុស្សខាងក្រៅដែលមិនមែនជាមន្រ្តីជលផល ឲ្យចូលរួមក្នុងសកម្មភាពបង្រ្កាបបទល្មើសនេសាទនោះវិញ លោក សៅ កុសល បានថ្លែងថា មន្រ្តីជលផលមានសិទ្ធិក្នុងការជួលកម្មករក្នុងការលើកដាក់ទំនិញ ឬឧបករណ៍ផ្សេងៗ តែត្រង់ថា ជួលកម្មករឲ្យទៅធ្វើការបង្រ្កាបបទល្មើសនេសាទនោះ លោកមិនអត្ថាធិប្បាយទេ ព្រោះថា ឋានៈ នាយរងអធិការកិច្ច គឺធំជាងតំណែងរបស់លោក។
គួររំលឹកថា ករណីចោទប្រកាន់នេះ គឺបានកើតឡើងកាលពីយប់ថ្ងៃទី៦ ខែមករា ឆ្នាំ២០២១ ដោយមានជនរងគ្រោះឈ្មោះ ភឹម វី អាយុ៤០ឆ្នាំ រស់នៅភូមិព្រៃផ្គាំ(គ) ស្រុកអង្គរបុរី ខេត្តតាកែវ។
តាមការរៀបរាប់របស់បងថ្លៃជនរងគ្រោះថា នៅយប់កើតហេតុនោះ ជនរងគ្រោះ និងអ្នកភូមិចំនួន២នាក់ទៀត បានចេញទូកទៅឆក់ត្រីនៅចំណុចកោះអញ្ចាញ ស្ថិតនៅក្នុងឃុំទ្រា ស្រុកសំរោង, ហើយនៅពេលនោះ ក៏មានទូករបស់មន្រ្តីជលផល មានមនុស្សចំនួន១០នាក់ ដឹកនាំដោយលោក គឹម សារិទ្ធ នាយរងអធិការកិច្ចចតុមុខ បានមកដល់, ហើយពេលនោះ អ្នកភូមិ២នាក់ដែលទៅជាមួយក៏បានលោតចូលទឹក ហើយក៏រត់រួច ដោយនៅសល់តែជនរងគ្រោះត្រូវបានមន្រ្តីជលផល និងបក្ខពួកវាយបណ្តាលឲ្យរងរបួសធ្ងន់ ហើយគេក៏បញ្ជូនទៅកាន់មន្ទីរពេទ្យបង្អែកខេត្តតាកែវ និងបានទូរស័ព្ទឲ្យក្រុមគ្រួសារទៅមើលជនរងគ្រោះនៅមន្ទីរពេទ្យ ហើយពេលនោះដោយស្ថានភាពជនរងគ្រោះធ្ងន់ធ្ងរពេក ទើបក្រុមគ្រួសារបញ្ជូនជនរងគ្រោះបន្តមកកាន់មន្ទីរពេទ្យកាល់ម៉ែត្រក្នុងរាជធានីភ្នំពេញ៕