(តាកែវ) – ករណីលោក ប៉ែន រដ្ឋា អធិការរងនគរបាលស្រុកអង្គរបូរីលួចរំដោះមនុស្សចេញពីមណ្ឌលចត្តាឡីស័កឲ្យត្រឡប់ទៅផ្ទះវិញនោះ មកទល់ពេលនេះ អធិការរងរូបនោះពុំទាន់មានលិខិតស្នាមអ្វីដើម្បីដោះបន្ទុកការចោទប្រកាន់នេះទេ ខណៈដែលប្រធានមន្ទីរពេទ្យបង្អែកស្រុកអង្គរបូរីបានថ្លែងថា លោកពុំដែលបានអនុញ្ញាតឲ្យមានការយកមនុស្សចេញពីមណ្ឌលចត្តាឡីស័កនោះឡើយ។
លោក សេង គឹម ប្រធានមន្ទីរពេទ្យបង្អែកស្រុកអង្គរបូរី បានថ្លែងប្រាប់ អេអិនអិន ថា នៅថ្ងៃនោះ លោក ប៉ែន រដ្ឋា បានស្នើមកលោកដើម្បីយកមនុស្សចេញពីមណ្ឌលចត្តាឡីស័ក តែលោកហ៊ានអនុញ្ញាតឡើយ ដោយបានប្រាប់លោក ប៉ែន រដ្ឋា ឲ្យទៅសុំលោកអភិបាលស្រុកវិញ។
លោក ឌឹម គឹមសាន្ត អភិបាលស្រុកអង្គរបូរី បានថ្លែងថា លោកដឹងរឿងនេះខ្លះៗដែរ តាមរយៈលោក រស់ រត្ន័អភិបាលរងស្រុករាយការណ៍ជូនលោក ដោយអធិការរងរូបនោះបានសុំយកមនុស្សចេញពីមណ្ឌលតែលោកមិនបានអនុញ្ញាតិឲ្យយកចេញទេ តែលោកអធិការរងរូបនោះបានយកមនុស្សចេញផុតទៅហើយ។
យ៉ាងណាក៏ដោយ ចំពោះករណីលោកអធិការរងស្រុកអង្គរបូរី ដែលប្រើអំណាចតាមចិត្ត យកមនុស្សចេញពីមណ្ឌលចត្តាឡីស័ក ដែលជាហានិភ័យក្នុងការចម្លងជំងឺកូវីដ១៩ទៅក្នុងសហគមន៍នោះ គេរំពឹងថា លោកស្នងការនគរបាលខេត្តតាកែវ នឹងធ្វើការស៊ើបអង្កេតរឿងនេះ ព្រមទាំងចាត់ការបុគ្គលដែលធ្វើខុសតាមច្បាប់។
បើយោងតាមមាត្រា ២៣ នៃអនុក្រឹត្យ ស្តីពីការទប់ស្កាត់ការឆ្លងរាលដាលជំងឺកូវីដ១៩ «អ្នកផ្តើមគំនិត ដឹកនាំ ណែនាំ បញ្ចុះបញ្ចូល ឬជួយសម្រួលដោយចេតនា ដល់បុគ្គលដែលត្រូវធ្វើចត្តាឡីស័កឲ្យគេចចេញពីការត្រួតពិនិត្យរបស់មន្រ្តីចត្តាឡីស័ក ឬគេចវេសពីការធ្វើចត្តាឡីស័ក ឬគេចចេញពីទីកន្លែងធ្វើចត្តាឡីស័ក ត្រូវផ្តន្ទាទោសជាពិន័យអន្តរការណ៍ពី ១០លានរៀល ទៅ ៥០លានរៀល»៕
